Link açıqlığı

Saatnıñ esas haberi

Qırımdan çıqqan genç pianinocı İsviçredeki festivalde çıqış yaptı


Hristina Mihayliçenko, arhivden alınğan fotoresim
Hristina Mihayliçenko, arhivden alınğan fotoresim

Qırımlı genç pianinocı Hristina Mihayliçenko iyünniñ 10-nda, İsviçreniñ Biel/Bienne şeerinde ötkerilgen «ArtDialog» medeniyetler festivalinde çıqış yaptı. Bunı Qırım.Aqıqatqa qızçıqnıñ anası Natalya Mihayliçenko tarif etti.

«ArtDialog» kibi festivaller – bu sadece yañı teessuratlar, til tecribesi, üner tecribesi, dünya sıñırlarınıñ kerilüvi degil, bunen beraber bu çalğıcı şahsiyetiniñ inkişafında da bir siltemdir. Bunıñ temelinde bir-çoq azırlıq tedbirleri ve ceryannıñ üst noqtası – sıcaq yürek nurınen tolu alğışlarnı bağışlağan kontsert bar», – dedi Natalya Mihayliçenko.

Hristinanıñ sözlerine köre, o çoq vaqıt devamında azırlandı ve festivalde çıqış yapmaq içün programmasını saylay edi.

«Başta programmanı saylamaq, soñra er şeyni ezberlemek içün çoq çalışmaq: yañı tehnika, yañı muzıka, soñ bir de bir şey hoş kelmey, onı başqa türlü çalmaqnı tüşünip başlaysıñ, soñra adamlar ögünde programmanı defalarca icra etmek. Bu kibi festivalde çalmaq – büyük mesüliyettir. Ve, qaç kere programmanı icra etken olsam da, esas kontsert daa ögde olğanını añlay edim. İsviçrede. İlk kere çalğanım memlekette. Menim kontsertim F.Listniñ Petrarch Sonelerinen başlana. List İsviçreni seve edi ve anda çoq seyaat etti. Men de İsviçreni körgenime pek sevinem», – dedi genç pianinocı.

«ArtDialog» medeniyetler festivali 2012 senesinden berli İsviçreniñ Biel/Bienne şeerinde ötkerile. Bu merasimniñ hususiyeti şudır ki – onda çeşit türlü sanat çeşitleri bir arağa ketirile, muzıka ve baletten başlap, şarapçılıqqa qadar.

Hristina Mihayliçenkonıñ qorantası Rusiyeniñ istilâsına oğraqan Qırımdan Kyiv vilâyetine köçti. Qızçıq ilk büyük yarışını beş yaşında qazanğan edi. 2015 senesi yanvar ayında Hristina Mihayliçenko Felemnkte pianinocılar arasında ötkerilgen prestijli halqara musabaqada ğalip olğan edi.

XS
SM
MD
LG