Milliy telekanallarnı yayınnıñ 75% ukrain tilinde alıp barmağa mecbur etken qanun Yuqarı Şuranıñ «Golos Ukrainı» resmiy neşirinde iyünniñ 13-nde derc etildi. O derc etilgeninden soñ dört ay soñra – oktâbrniñ 13-nde amelge keçecek.
Ukraina Yuqarı Radası ekinci oquvda umummilliy telekanallardaki kontentniñ 75% ukrain tilindeki olması şart olğanınen bağlı qanun leyhasını qabul etti. Qanunğa binaen, saat 7:00-18:00 ve 18:00-22:00 arasında çıqqan umumiy yayınlar ve kösterilgen zaman bölümü arasında ukrain tilindeki yayın, film ve haberlerniñ umumiy müddeti eñ az 75% teşkil etmeli. Yerli kategoriyada yayınlamağa aqlı olğan teleradiokompaniyalar efirleriniñ eñ az 60%ni ukrain tilinde yapmalı. Şartlarğa uymağan teleradiokompaniya litsenziya alımı umumiy miqdarınıñ 5% qadar ceza töleycektir.
Qırımtatar Milliy Meclis reisi Refat Çubarovnıñ fikirine köre, ukrain teleradiokompaniyalarnıñ til normaları aqqında qanun memleketteki tamır halqlarınıñ tillerini inkişaf ettirmege imkân berecek, çünki tamır halqlarnıñ tilleri, devlet tili olamasa da, yayınlarnıñ 70% qısımını teşkil ete bilecek.
İyün 9 künü bu qanun, prezident tarafından imzalanıp, parlamentke qaytarılğan edi.
«İnter Media Group» media şirketi TV-de til normalarınıñ qabul etilmesine qarşı çıqtı, «Muhalifet blokı» debutatları ise bu qanunnıñ qabul etilmesi munasebetinen Konstitutsiya Mahkemesine muracaat eteceklerini beyan etti.
