Ellige yaqın jurnalist – «Açıq Qırım: öz közleriñnen» adlı media forumnıñ iştirakçileri – işğal etilgen Qırım tarafından Keriç köpüriniñ qurucılığını ziyaret etti. Bunı «Krımskiy most» haber merkezi bildire.
Eyyette Bulğaristan, İtaliya, Almaniya, İspaniya, Kuba, Suriye, Lübnan, İslandiya, Küveyt, Ukrainadan jurnalistler olğanı haber etile. Amma haber merkezi ukrain jurnalistiniñ adını derc etmegen.
Bu ziyaetni Rusiye Tışqı işler nazirligi teşkil etken.
«Çetel kutleviy haber vastalarınıñ vekilleri, gemilerni keçire bilecek Qırım köpüriniñ kemerleri nasıl etip qurulacağını kördi. Demir yollarnıñ eki parçasını pekitilmesi qaldı ve köpürniñ eki tarafı biri birine qoşulacaq. Kemerler serbest keçit tayamaları üzerine oturacaq. Olarnıñ Keriç-Yeniqale kanalındaki inşaat jurnalistlerge numayış etildi», – dep aytıla bildirüvde.
Keçende Kremlniñ nezaretinde çalışqan Qırımnıñ İçki siyaseti, informatsiya ve rabıta naziri Dmitriy Polonskiy, çetel jurnalistlerini Keriç köpüriniñ qurucılığı «uydurma» olmağanına qanmağa çağırğan edi.
Kremlniñ kontrolündeki akimiyet çet memleketlerniñ vekillerini er daim Qırımğa davet ete ve böylece, yarımadanıñ «rus» statusını qanunlaştırmağa tırışa.
Ukraina Tışqı işler nazirligi bundan evel beyan etti ki, çetel siyasetçileriniñ Qırımğa yapqan ziyaretleri resmiy degildir. 2016 senesi iyül ayında Ukrainanıñ haric siyaset nazirligi öz muracaatını derc etip, çetel vatandaşlarnı ve vatandaşlığı olmağan şahıslarnı Qırımnı qanunsız ziyaret etmemege çağırdı.
Keriç boğazında köpür qurucılığı aqqında Rusiye prezidenti Vladimir Putin Qırım işğalinden soñ birden ilân etti. Köpürni 2018 senesine qadar qurıp bitirmege, 2019 senesi yazda ise çalıştırılıp bailaycağını vade ettiler.
Bundan evel Rusiye ükümeti Keriç boğazındaki köpürniñ demir yol qısmınıñ vaqtınca açılmasını– 2018 senesi dekabr ayından 2019 senesi dekabr ayına olmaq üzre- bir yılğa uzattı.
Ukraina tarafı 2014 senesi Qırım işğalinden soñ Rusiye ile köpür qurucılığı añlaşmasından ayırıldı.
