Rusiyeniñ Moskva ve Petersburg şeerlerinde iyünniñ 12-nde, muhalifetçi Aleksey Navalnıynıñ çağıruvınen teşkil etilgen, qabarcılıqqa qarşı narazılıq aktsiyaları devamında 700-ge yaqın iştirakçi politsiya tarafından tutıldı. Daa onlarnen adamlar Vladivostoktan Kaliningradqa qadar Rusiyeniñ başqa şeerlerine tutıldı.
Moskvada tutılğanlar arasında – muhalifet siyasetçileri İlya Yaşın ve Vâçeslav Maltsev, «Qabarcılıqqa qarşı küreş Fondınıñ» müdiri Roman Rubanov ve başqa failler bar.
Narazılıq aktsiyalarınıñ teşebbüsçisi olğan Aleksey Navalnıy, aktsiya başlanmazdan evel Moskvada politsiya tarafından tutıldı.
Bundan evel Moskva şeeriniñ idaresi muhalifetçilerge Tverskaya soqağında kezmege izin berdi, amma, Navalnıynıñ ştab yolbaşçısı Leonid Volkovnıñ sözlerine köre, şiarlarnıñ yazılması ve seslendirilmesi yasaq etildi.
Petersburg şeeriniñ yerli akimiyeti muhalifetçi Navalnıynıñ tarafdarlarına, olar Marsovo alanına kelgen soñ, avtobuslarnen şeer çetine ketip narazılqnı anda bildirmege teklif etti.
Muhalifetçiler Rusiyede miting kibi ve başqa çeşit aktsiyalarnıñ keçirilmesi içün 224 şeerde muracaat etti. Şeerlerniñ ekseriyetinde narazılıqnıñ bilidirilmesine izin berilmedi.
