Link açıqlığı

Qırımda qomşu Rusiyeniñ bayramı qayd etile


2014 senesinden berli Rusiye tarafından idare etilgen Qırımda da iyünniñ 12-nde Rusiye Künü qayd etilecek.

Aqmescitniñ merkezinde bu künü yol areketi sıñırlanacaqtır, çünki Rusiye Künü bayramı çerçivesinde «Ulu rus sözü» festivaliniñ tantanalı qapatıluvı ötkerilecek.

Qırım sakinlerine, kütleviy merasimler devamında yasaq etilgen areketler aqqında hatırlatıldı. FVN qurtatıcıları tahmin etti ki, bu künü ğıda ve içimliklernen zeerlenüv adiseleri çoqlaşacaq. Fevqulâde vaziyetler nazirligi, keyfiyetsiz spirtli içkiler – telükeniñ menbaası olaracağını tüşüne.

Bu arada Rusiyeniñ özünde bir sıra şeerlerde qabarcılqqa qarşı aktsiyalarnıñ ötkerilmesi belgilendi. Regionlarda narazılıqnıñ bildirüvini Navalnıynıñ safdaşları teşkil ete. Olar akimeyt tarafından basqı körgenlerini beyan ete. Rusiyeli muhalifetçiniñ Qırımdaki tarafdarları iyünniñ 12-nde mitingni teşkil etmek ğayesinden vazgeçti, sebeplerden biri de – apiske oğramaq ihtimalı.

Sorav neticelerine köre, rusiyelilerniñ ancaq 49% «Rusiyede bu künü (iyünniñ 12-nde) nasıl bayram qayd etilgenini tam bilesiñizmi?» degen sualge, «Rusiye Künü» dep cevap bere bildi. Bunen beraber 32% «Rusiyeniñ mustaqillik künü» bayramını ayttı. Bayramnıñ başqa sebeplerini (Rusiyeniñ ilk prezident saylavı ve Suverinitet aqqında Deklaratsiyanıñ qabul etilüvi) aqqında cevap bergenlerniñ 10% azı hatırlay.

XS
SM
MD
LG