Link açıqlığı

Grybauskaite: Rusiyege qarşı sanktsiyalarnıñ hafifleşmesine sebep yoq


Litvaniya prezidenti Dalia Grybauskaite, Rusiyege qarşı Ğarp memleketleri tarafından qabul etilgen sanktsiyalarnıñ hafifleşmesine sebep olmağanını beyan etti. Bunı o cuma künü Ukraina prezidenti Petro Poroşenko ile körüşkende ayttı.

Grybauskaite: «Noqta-i nazarımızğa köre, NATO, AB ve OSCE noqta-i nazarına köre, şarqiy sıñırlarda vaziyet fenalaşa, episiniñ közü ögünde tecavuziy davranış devam etmekte. Bu sebepten, sanktsiyalarnıñ hafifleşmesi içün iç bir sebep, şarait yoq», – dep ayttı.

Em o dedi ki, «normandiya formatı» çalışa, amma deñişmek ya da keñişletilmek te mümkün.

«Faqat, minsk añlaşmalarını eda etmekten ğayrı, başqa iç bir yolumız yoq», – dep qoştı Litvaniya prezidenti.

Avropa Birligi, AQŞ ve «Yediler gruppasınıñ» başqa devletleri, birdemlik olıp, Rusiye akimiyetinen bağlı olğan bir sıra ferdiy ve uquqiy şahıslarğa, em de Rusiye iqtisadiyatınıñ bazı sektorlarına qarşı, bir-qaç paket olaraq, iqtisadiy sıñırlamalar (sanktsiyalar) qabul etken edi. Moskvanıñ Qırımda ve Donbassnıñ bşr qısımda Ukrainağa qarşı yapqan ücümları sebebinden bu sanktsiyalarnıñ müddeti ara-sıra uzatıla.

Mayıs ayında «Yediler gruppasına» kirgen memleketlerniñ yolbaşçıları, Rusiye, Minsk añlaşmalına binayen, Ukrainağa nisbetten vazifelerini eda etmese, oña qarşı yañı sanktsiyalarnı qabul etmege azır olğanlarını beyan etken edi.

XS
SM
MD
LG