Link açıqlığı

Saatnıñ esas haberi

Ukraina MİD: yüzlernen ukrainli endi Avropa Birligine vizasız kirdi


Ukraina Tışqı işler nazirliginiñ (MİD) Konsullıq hızmeti bölüginde haber ettiler ki, Avropa Birligi ile vizasız rejim amelge keçkeninen ilk saatlar devamında er şey problemsiz çalıştı.

«Romaniya, Lehistan, Slovakiya, Macaristanda çalışqan konsullarımız Ukraina vatandaşları, biometrik pasportlarını qullanıp, AB devletleriniñ sıñırlarını serbest keçe bilgenlerini haber ete. Saat 5:35 olğanda AB sıñırını keçken ukrainlilerniñ cemi sayısı yüzlernen esaplana edi. Konsullar, keçit noqtalarında vaziyetni nezaret etmege devam ete», – dep aytıla Konsullıq hızmeti bölüginiñ bildirüvinde.

İyünniñ 11-nde Ukraina vatandaşları içün AB ve «şengen» devletlerine qısqa müddetli ziyaretlerge serbest viza rejimi amelge keçti.

Vizasız rejim Büyük Britaniya ve İrlandiyadan ğayrı Avropa Birliginiñ bütün devletleri ve «şengen zonasına» kirip AB azası olmağan devletlerine ait. Bu rejim şimdilik Felemenk ve Frenkinstan içün keçerli degildir.

İşbu oñaytlıqnen faydalanmaq içün biometrik pasportnıñ olması kerek, ve viza rejiminde olğanı kibi, sıñırcı organları tarafından talap etilse, ziyaretniñ maqsatlarını ve şartlarını, ödeme qabiliyetini ve bu kibi suallerge cevaplarnı isbatlamaq kerekligi olmaq mümkün.

Serbest viza rejimi, ait olğan devletlerde er 180 künden 90 kün devamında, iş yerine yerleşmeyip, bulunmağa imkân bere.

XS
SM
MD
LG