Link açıqlığı

Qırımda Rusiyeli akimiyet repressiya tehnologiyalarını sınay – rusiyeli advokat


Aleksandr Popkov, arhivden alınğan foto

Qırım Rusiye istilâsından soñ repressiya tehnologiyaları sınalğan bir meydanğa çevirildi. Bu aqta Kyivde Rusiyedeki tsenzura aqqındaki maruzasını taqdim etüv esnasında rusiyeli advokat Aleksandr Popov söz yürsetti, dep bilidire Qırım.Aqiqatnıñ muhbiri.

«Rusiye Qırımğa kelgen soñ, söz serbestligi o territoriyanı özüne boysundırması yolunda eñ esas sed rolüni oynadı. İşte bu sebepten onıñ, insanlarnıñ diger aq-uquqınen beraber sıqıp çıqarılması başlandı», – dedi o.

Popkovnıñ aytqanına köre, Qırımda soñki üç yıl devamındaki tendentsiya, onıñ sakinlerine nisbeten yapılğan repressiyalar Rusiyege köre daa da aşkâr olğanına şaat olmaq mumkün.

«Men yalıñız Ukraina tarafdarı olğan jurnalistler degil de, ukrain akimiyeti duşman tarafına keçti dep tanığan soyları bile taqip altında bulunğanını qayd etmege mecburım. Söz serbestligini bastırma yolları Rusiyede de qullanılmaqta, ancaq Qırımda olar daa da aşkârdır. Çünki rusiyeli akimiyet Qırımda repressiya tehnologiyaları sınalğan bir meydan teşkil etti», – dey advokat.

Qırım Rusiye tarafından isğal etilgen soñ, mustaqil jurnalistler, qırımlı failler, qırımtatar halqı Meclisiniñ azaları ve Rusiyede yasaq etilgen “Hizb ut Tahrir” teşkilâtınen bağlılığında şeklengen Qırım musulmanlarınıñ evlerinde kütleviy şekilde pek sıq tintüvler keçirilip başladı.

Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG