Kyive AQŞ elçihanesi yanında yüz bergen patlavnı, başta terakt kibi tanığan soñ qararnı deñiştirip, yaramazlıq olaraq qabul ettiler. Bunı Ukraina Milliy politsiyasınıñ alâqa bölügi beyan etti.
Milliy politsiya yolbaşçısı Sergey Knâzev dedi ki, patlav yeri tekrar baqılğan soñ boyle qarar alındı.
«Elçilikniñ azbarına atılğan patlav aleti iç kimsege zarar ketirmek mümkün degil edi. Bu sebepten, adise qaba huliganlıq (yaramazlıq) kibi tanıldı», – dedi Knâzev.
Knâzevniñ sözlerine köre, taqiqatnıñ alıp barılması içün mesuliyet Baş taqiqat idaresi ve Milliy politsiyanıñ cinaiy aqtaruv bölügine yüklenildi.
Ukraina telükesizlik hızmeti, bu iş çerçivesinde, terakt maqsadınen yapılğan cinayetniñ ihtimalını talil etmekte.
Politsiyada evel bildirdiler ki, iyünniñ 8-nde yarı geceden soñ elçilik azbarında patlav yüz berdi. Elçihane tarafından iç kimse zararlanmağanı ve binağa zarar berilmegeni beyan etildi. Elçilik bu adiseni terakt olaraq tanımağanını ayttı.
