Rusiyeli neşirci ve uquq qorçalayıcı Aleksandr Podrabinek, Rusiye tarafından istilâ etilgen Qırmda separatizmde qabaatlanğan Meclis reisiniñ muavini İlmi Umerovnıñ davasında cemaat imayecisi olaraq iştirak etmege izin aldı. Bunı Radio Svobodağa, Kremlniñ nezaretindeki Aqmescit rayon mahkemesiniñ toplaşuvında bulunğan Umerovnıñ qızı Ayşe haber etti.
«İmaye tarafı muracaat etip, namlı dissident ve moskvalı uquq qorçalayıcı Aleksandr Podrabinekni cemaat imayecisi olaraq mahkeme ceryanına qoşmağa izin soradı. Prokurornıñ itirazına baqmadan, mahkeme Podrabinekni davağa qoştı», – dedi o.
İyünniñ 7-nde işğal etilgen Qırımda Kremlniñ nezaretindeki Aqmescit rayon mahkemesi İlmi Umerov davasınıñ esasını baqıp başladı.
Umerovnıñ advokatlarından biri Mark Feygin Qırım.Aqiqatqa bergen izaatında dedi ki, Umerovnıñ davası boyunca mahkeme «bir-qaç toplaşuvnen bitmez». Advokat «Umerov davasınıñ ükümi evelden belli» olğanını da ayttı.
2016 senesi FSB taqiqatçıları İlmi Umerovqa qarşı ektremizm maddesi boyunca cinaiy iş açqan edi. Qırımtatar milliy areketiniñ belli iştirakçisi, qırımtatar Meclisi reisiniñ muavini olğan İlmi Umerovnıñ tutulıp alınuvı, evindeki tintüv ve oña qarşı cinaiy işniñ açılması, mecburiy surette mahkeme-psihiatrik ekspertizanıñ keçirilmesi içün onıñ delihanege yerleştirilmesi – cemiyette ve dünyada rezonans çıqarğan edi.
Qırımtatar Meslisiniñ reisi Refat Çubarov İlmi Umerovnıñ taqip etilüvini, Rusiye işğal etken Qırımda qırımtatar halqına qarşı doğrultılğan quvğunlıq ve zulum kampanyasınıñ bir qısmı dep saya.
