İyünniñ 6-nda «Hersones Tavriçeskiy» qoruq-muzeyinde «Qırımnen Suriye ve Yaqın Şarq devletleri arasındaki tarihiy, medeniy, milletlerara ve diniy bağlar» adlı konferentsiya öz işini başlattı, dep bildirile muzeyniñ saytında.
«Konferentsiyağa böyle bir mevzu saylânmasınıñ sebebi, Qırım qadimiy zamanlarda ve orta asırlarda ğarp ve şarq medeniyetleri körüşken özüne has bir yer olıp kelgen. Qırımdaki medeniy ve milliy çeşitlikniñ sebebi, asırlar boyunca yarımadada yaşağan halqlarnıñ dini, adeti ve ananeleriniñ örmeleşüvinden kelip çıqa», – denilmekte haberde.
İyünniñ 6-nda qoruq-muzeyde ayrıca «Hersones – Suriye ve Yaqın Şarq. Asırlar boyu devam etken kontaktlar» sergisi keçirilecegi aqqında ilân etildi.
«Hersones Tavriçeskiy» qoruq-muzeyi UNESCOnıñ Bütündünya asabalığı obyektleri cedveline kirmekte, lâkin 2014 senesinden itibaren teşkilât, Rusiye Qırımnı işğal etkenini tanımağanı sebebinden qoruq-muzeyniñ saqlanğanınen bağlı monitoringni ötkermemektedir.
