Avropa birligi azası olğan 28 devletniñ elçileri Qırımğa nisbeten kirsetilgen sanktsiyalarnı bir yılğa uzatmağa razı oldı. Bu aqta Twitterde Radio Svobodanıñ brüsselli muhbiri Rikard Jozwiak yazmaqta.
Onıñ bildirgenine köre, işbu qarar iyünniñ 19-nda Avropa birligine kirgen devletlerniñ tışqı işleri nazırleriniñ seviyesinde tasdıqlanacaq eken.
«AB elçileri Avropanıñ Qırımdaki yatırım yasağıni bir yılğa uzatmağa qarar berdi. Qarar iyünniñ 19-nda tışqı işler nazırleriniñ seviyesinde tasdıqlanacaq», – dep yaza jurnalist.
Sıñırlav tedbirleri 2014 senesi mart ayında Avropa birliginiñ Ukrainadaki buhranğa nisbeten reaktsiyası sıfatında kirsetilgen edi. Olar bir taraftan, Rusiye iqtisadiyatınıñ muayyen sektorlarına qarşı doğrultılğan ve 2017 senesi iyülniñ 31-ne qadar üküm sürgen iqtisadiy sanktsiyalarnı qaplamaqta. Diger taraftan, Qırım ve Aqyarnıñ qanunsız şekilde işğal etilmesine qarşı bir cevap şeklindeki sıñırlav tedbirleri olaraq, 2017 senesi iyunniñ 23-ne qadar devam etecektir.
Ondan da ğayrı, Ğarp 2014 senesinden başlap Donbasstaki vaziyetniñ istiqrarsızlığı sebebinden sanktsiyalar kirsetken edi. Olar esasen Rusiye vatandaşlarınen şirketlerge qarşı doğrultılğan sanktsiyalar. Sanktsiyalar Rusiye iqtisadiyatınıñ bazı dallarına qarşı da kirsetilgendir.
Kreml Donbasstaki separatistlerge qoltutuvğa alâqası olğanını inkâr ete ve çatışma zonasında yalıñız rusiyeli «göñülliler» bulunğanını qabul etmekte. Ayrıca Rusiye Qırımnı zapt etkenini inkâr eterek, bunı «tarihiy adaletniñ tiklenmesi» dep adlandıra.
