Link açıqlığı

Mahsus Qırım.Aqiqat içün

«Er kes aynı» ve «iç bir şey deñişmey» – bu diagnoz degil de, günah çıqartmaqnıñ yolu. İnsanlar bizge yalıñız nasıl olğanları aqqında ikâye eteler.

İçinde edebsizlik seviyesi artqan anda cemiyetniñ ayaqta qalabilme qabiliyeti ep eksilip bara. O arada o dağılıp başlay ve tıştaki qozğayıcılarğa diqqat ayırmay qoya. Er türlü miqyastaki sarsıntılar onıñ qalbinde ne ğam-qasevet, ne birlik, ne de birdemlik kibi kütleviy duyğularnı uyandırmay. Cemiyet aralarında iç bir türlü bağ olmağan ayrı insanlardan tertiplenerek atomlaşa. İşte tamam bu maalde bu cemiyetni istegen şekliñe soqmaq mumkün.

İçinde edebsizlik seviyesi artqan anda cemiyetniñ ayaqta qalabilme qabiliyeti ep eksilip bara. İşte tamam bu maalde bu cemiyetni istegen şekliñe soqmaq mumkün

​«Er kes aynı» – işte bu añlaşmamazlıqtaki birlik formulasıdır. Böyle degenlerniñ episi, sadece areketsizligini aqlaycaq bir vasıta qıdırmaqta. O, komforttan ayrılmağa ve iç bir şey deñiştirmege ismeyip, tenbellik ve prinsipsizlikniñ advokatlığını yapa. İdealsız insanlar onıñ yardımınen bulunğan soylârına yardım etmekni red eteler.

«İç bir şey deñişmey» degen mevzunen bağlı mulâazalar – günah çıqartmaqnıñ yolu. Tsinizm –işte birdeger kontsepsiyasıdır, onıñ ğayesi insandaki yüksek motivlerni inkâr etmekten ibaret. O insannıñ içinde eyilik bar olğanına inanmamaq üzerine qurulğan ve yalıñız ondaki yaramaylıqlarnı esapqa ala. Ve er bir vaziyette öz içki dünyasınıñ etrafındaki kerçek ayatqa yapılğan proyektsiyasıdır.

Degerlerge inanmamaqnıñ kinayesi şudır ki, zemaneviy Rusiyeniñ esas mündericesi bundan ibarettir. Yalan ve dolan dünya quruluşınıñ alfa ve omegası olğanını tekrarlamağa usanmağannıñ mündericesidir. Rusiye o manada iç bir qayde bozmay ve qırmızı sızıqtan kesip keçmey, yalıñız er kes yapqan şeyni yapa. Onıñ içün Qırım ya da razı olmağanlarğa qarşı küreş ve Donbass hususındaki yalacılıqnen bağlı er angi bir yüzlevni o, «sen özüñ delisiñ» formulasınen savuştırıp yibere.

Degerlerge inanmamaq – zemaneviy Rusiyeniñ esas mündericesidir. Onıñ içün Qırım ya da razı olmağanlarğa qarşı küreş ve Donbass hususındaki yalancılıqnen bağlı er angi bir yüzlevni o, «sen özüñ delisiñ» formulasınen savuştırıp yibere

«Hainlikniñ» optikası şudır ki, onıñ bozulması bir qalıp, norma dep ilân etile. Eyilikniñ eñ yüksek derecesi – köz qaytması sayıla. Birisi eñip çıqmaq aqqında aytqan maaldeki yüksek noqtalardan tiklengen bir çeşit yalan köz qıpma şekli. Ve buña beñzer er bir kibirli üküm göñilli teslimni añdıra.

Çünki insan zayıftır ve başqalarına özüne köre qıymet keser.Öz baqış ve qatiy işançını o, başqalarına qıymet kesecek bir norma ve ölçü olaraq qabul ete. İşte bu sebepten onıñ içün dünya, o özü yañı bir şeyler yapmağa başlağan vaqıtta «deñişip başlay». Alışqanlıqları tışına alıp ketken bir şeyler yapmağa başlağandan soñ. Onıñ temel aqqındaki tüşüncesini deñiştirmege başlağan soñ.

Etrafındaki dünyanı tarif etüv – şahsiy duyğularnıñ küzgüsidir. İnsan aqiqatnı tasvirlev şekli – bu onıñ içki dünyasınıñ aksidir. Murekkep insannıñ dünyası murekkep, qolay insannıñ dünyası- qolay, mülâyim insannıñki – cevapkâr, sarannıñ dünyası ise – qara niyetli.

Bu sebepten, «iç bir şey deñişmey» denilgenini eşitseñiz– demek, ögüñizde iç bir zaman deñişmegen insan tura. Özüni umumiyleştirmesin bare.

Pavel Kazarin, Qırımlı jurnalist, Qırım.Aqiqatnıñ közeticisi

«Fikir» rubrikasında bildirilgen fikir-tüşünceler müelliflerniñ noqtaiy nazarını aks ettirip, muarririyetniñ baqışlarınen bir olmaması mumkün

XS
SM
MD
LG