İyülniñ 1-nden başlap Qırımda bazı ağır maşna çeşitleri içün mahsus areket tertibi mecbur etilecek. Asfaltnı qorumaq içün yaz mevsiminde qomşu Rusiyede qabul etilgen bu kibi sıñırlamalar aqqında Kremlniñ nezaretindeki Qırım akimiyeti haber ete.
«2017 senesi iyülniñ 1-nden başlap sentâbrniñ 30-na qadar saat 10:00-22:00 aralarında, Qırım Cumhuriyetinde Rosgidrometniñ köstergen ava arareti 32 dereceden sıcaq olğanda Qırımnıñ regional yollarında areket sıñırlanacaq», – dep haber etile.
Yarımadanıñ şimdiki akimieti, böyle tedbir alınsa «avtomobil yolları vaqıttan evel bozulmaycağını ve közge alınmağan tamir işlerine devlet bücetinden ziyade para masraf etilmeycegini» tüşüne.
Evel haber etilgeni kibi, raatlıq mevsimi devamında Keriç-Aqmescit trassasında yük maşnaları ancaq gece vaqıtında areket etip olacaq.
Kremlniñ nezaretindeki Keriç memuriyeti 2016 senesi şeerde avtomobil yollarınıñ cemi uzunlığı tahminen 400 km teşkil etkenini ve olarnıñ 80% maşnalarnıñ telükesiz areketi içün kelişmegenini ve tamir etilmek kerek olğanını bildirgen edi.
