Link açıqlığı

Ukraina MİDi Rusiyeden jurnalistler Semena ve Suşenkonıñ azat etilmesini talap ete


İyünniñ 6-nda qayd etilgen Jurnalistler kününde Ukaina Tışqı işler nazirligi (MİD) Rusiye tarafından ukrain jurnalistleri Nikolay Semena ve Roman Suşenkonıñ taqip etilmesini toqtatmağa talap etti. Bunı Twitterde ukrain nazirliginiñ temsilcisi Maryana Betsa yazdı.

«Tamam Jurnalistler kününde Rusiye Federatsiyasından nevbetteki sefer jurnalistler Suşenko ve Semenanıñ siyasiy taqibini toqtatmağa talap etemiz», – dep yazdı Betsa.

Kyivde Jurnalistler künü munasebetinen, Rusiye tarafından eziyet körgen jurnalistlerge, ayrıca – Nikolay Semenağa ve Roman Suşenkoğa, destek bildirmek içün mahsus aktiya ötkerilecegi ilân etildi.

İyünniñ 6-nda, salı künü Ukrainada kütleviy haber vastaları hadimleriniñ zenaat bayramı – Jurnalistler künü qayd etile.

Ukraina Milliy jurnalistler birligi 2017 senesi, öz faaliyetiniñ eñ müim maqsatları sırasında – ukrain jurnalistleri Nikolay Semena ve Roman Suşenkonıñ qorçalanuvı içün ğayretini arttımağa niyetlendi.

Keçende, iyünniñ 5-nde Kremlniñ nezaretindeki Aqmescitniñ Demiryol rayon mahkemesi qırımlı jurnalist Nikolay Semenanıñ davasında nevbetteki toplaşuv ötkerdi. Soñraki oturış iyünniñ 14-ne tayin etildi.

Qırımda jurnalist Nikolay Semena «Rusiye Federatsiyasınıñ topraq bütünligini bozmaq içün kütleviy çağıruvlarda» şeklenip Rusiye Cinaiy kodeksiniñ 280.1 maddesiniñ 2 qırısımı esasında qabaatlana. Taqiqatçılar tarafından tizilgen cinaiy dava altı cılttan ibaret. FSB tarafından sorğulanğanda Nikolay Semena dedi ki, öz maqalelerinde o «fikir serbestligi» aqqını qullandı.

Nikolay Semenanıñ advokatları, Halqara ve Avropa jurnalistleri Federatsiyası, em de OSCE ifade serbestligi meseleleri Temsilcisiniñ ofisi, FSBge muracaat etip, onı Qırımdan tedaviylenmesi içün yibermege çağırdı, lâkin müsbet cevap şimdige qadar daa berilmedi.

Ukrain jurnalisti, «Ukrinform» agentliginiñ Frenkistandaki mahsus muhbiri Roman Suşenko, sentâbr 30 künü Moskvada yaqalanğan edi. O Rusiyege şahsiy işlerinen, soy-sopını ziyaret etmek içün kelgen edi. Rusiye Federal telükesizlik hızmeti onı casuslıqta qabaatlap, onı «Ukraina Mudafaa nazirliginiñ Baş istihbarat idaresiniñ hadimi» olaraq tanıta. Rus taqiqatçıları oña qarşı «casuslıq» qabaatı boyunca cinaiy dava başlattı. Suşenko bütün iddialarnı red ete. Ukrain tarafı jurnalistke atılğan qabaatlar esassız olğanını beyan et eve onı azat etmege talap ete.

XS
SM
MD
LG