Link açıqlığı

Qırımlı jurnalist Semenanıñ mahkemesi iyünniñ 14-nde devam etecek – advokat


Kremlniñ nezaretindeki Aqmescitniñ Demiryol rayon mahkemesi qırımlı jurnalist Nikolay Semenanıñ davasını iyünniñ 14-nde baqmağa devam etecek. Bunı iyünniñ 5-nde Semenanıñ advokatı Aleksndr Popkov Qırım.Aqiqatqa bergen izaatnıda haber etti.

«Yazılı delillerniñ ilân etilmesinen bağlı rutin işleri (iyünniñ 5-nde ötkerilgen toplaşuvda – QA) devam etti. Devlet qabaatlayıcısınıñ sözlerine köre, bütün vesiqalar seslendirildi: çeşit teftiş vesiqaları, aqtaruv tedbirleriniñ kâğıtları, vesiqa tercimeleri. Nevbetteki toplaşuv iyünniñ 14-ne saat 12-ge tayin etilgen», – dedi Popkov.

Dekabrni 7-de taqiqatçı jurnalist Nikolay Semenağa Rusiye Cinaiy kodeksiniñ 280.1 maddesiniñ 2-nci qısmındaki «Rusiye Federatsiyasınıñ topraq bütünligini bozacaq areketlerge açıq çağıruv yapması» ile qabaatlanğanını aydınlattı. Taqiqatçı tizgen cinaiy iş 6 cılttan ibaret.

FSB sorğusında Nikolay Semena yazğan işlerinde «fikirini bildirme» aqqını qullandı, dep bildirile.

Ukraina Tışqı işler nazirligi işğal etilgen Qırımda Ukraina vatandaşları, şu cümleden Nikolay Semenanıñ taqip etilmesinden qasevetlengenini bildirip, oña qarşı yapılğa basqını toqtatmağa çağıra.

XS
SM
MD
LG