Link açıqlığı

Saatnıñ esas haberi

Advokat Feygin «Umerovnıñ davası» aqqında: bu tesirli bir cereyan olacaq


Rusiyeli advokat Mark Feygin Kreml nezaretindeki Qırım mahkemesinde qırımtatar milliy areketiniñ yetekçilerinden biri olğan İlmi Umerovnı temsil etmek niyetinde. Advokat Facebookta haber etkenine köre, o «eñ yaqın künlerde» Qırımğa ketecek ola eken.

«Bu ba-a-ayağı vaqıtqace aqılda qalacaq bir cereyan olacaq!» – dep ilâve ete advokat.

«Umerov davası» boyunca mahkemege azırlıq toplaşuvı mayısnıñ 31-nde ötkerilgen edi. O zaman mahkeme advokatlardan biri olğan Emil Kurbedinovnıñ bulunmamasına baqmadan, azırlıq toplaşuvı kününe deñiştirmekni red etken edi. Ayrıca Mark Feygin de davağa kirip olamağan edi. Nevbetteki mahkeme toplaşuvı iyünniñ 7-nde keçirilecek.

2016 senesi mayısnıñ 12-nde Qırımnıñ sabıq prokurorı Natalya Poklonskaya FSB taqiqiatçıları ekstremizm maddesine binaen İlmi Umerovqa qarşı cinayi iş açqanları aqqında bildirgen edi.

Qırımtatar milliy areketiniñ belli iştirakçisi olğan İlmi Umerovnıñ tutulıp alınuvı, evindeki tintüv ve oña qarşı cinaiy işniñ açılması, mecburiy surette mahkeme-psihiatrik ekspertizanıñ keçirilmesi içün onıñ delihanege yerleştirilmesi – cemiyette ve dünyada rezonans çıqarğan edi.

Meclis reisi Refat Çubarov, İlmi Umerovnıñ taqip etilmesini Rusiye tarafından zapt etilgen Qırımda qırımtatar halqına qarşı yapılğan aqsızlıq ve zulumnıñ bir qısmı dep tanıy.

Kreml nezaretini altındaki Aqmescit rayon mahkemesi bergen malümatqa köre, İlmi Umerovğa qarşı Rusiye Cinaiy kodeksiniñ 280.1 maddesi boyunca açılğan cinaiy dava keçende qadı Andrey Kulişovğa teslim etilgen edi.

«Mirotvorets» saytındaki malümatqa köre, Andrey Kulişov, qadı şeadeti ile Ukraina CK 111 maddesini bozğanı içün («devlet hainligi»), Ukraina uquq qoruyıcı olrganları tarafından qıdırılmaqta.

Aynı zamanda Andrey Kulişovnıñ adı Ukraina Yuqarı adalet şurası tarafından işten boşatılğan qadılar cedvelinde keçmemekte.

XS
SM
MD
LG