Link açıqlığı

Ukraina Haber siyaseti nazirligi: qırım sakinleriniñ 70% ukrain televideniyesini seyir etip ola


Emine Ceppar, arhivden alınğan resim

İşğal etilgen Qırım üzerindeki Rusiyeniñ «haber qubbesini» yarımadanıñ sakinleri ukrain televizion kanallarına yol açqan sputnik vastasınen teşip keçebileler. Bu aqta Qırım.Aqiqat.Radiosı efirinde Ukraina Haber siyaseti naziri vazifesini vaqtınca eda etken Emine Ceppar ikâye etti.

«İşğalci akimiyetnen Kremlniñ istegi belli – olar Qırımnı dünyadan maksimum uzaqlaştırıp, andaki insanlarnıñ bütünley miyi yuvulğan, propaganda altında qalğan ve qarşılıq köstermeycek insanlardan teşkil etilgen bir basıq zonağa çevirmege isteyler. Yekâne olğan bir şey de- sputniktir ve bizim esabımızğa köre, Qırımdaki Ukraina vatandaşlarınıñ 70% çanaq antenna vastasınen ukrain SMİlerini seyir etme imkânına saipler. Men elde etken malümatqa köre, bir çoq insan ukraina televizion kanallarını seyir ete eken», – dep qayd etti Ceppar.

2014 senesi Qırım zapt etilgen vaqıtta yarımadanıñ media alanından ukrain televizion kanallarınıñ ekseriyeti yoq etilerek, yerine Rusiye kanalları kösterilip başladı. Belli bir vaqıt keçken soñ, yarımadadan esas Ukrainağa «Çernomorskiy» ve qırımtatar ATR telekanalları köçip keldiler. Ancaq Qırım sakinleri çanaq antenna vastasınen bazı bir ukrain televizion kanallarınen seyir etip, bazı radiostantsiyalarnı diñleme imkânına saipler.

Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG