Link açıqlığı

Qırımda mahkeme «qırımlı diversant» Zahteyni avgust ayına qadar apiste qaldırdı


Kremlniñ nezaretinde çalışğan Aqmescitteki Kiyev rayon mahkemesi iyünniñ 2-nde Andrey Zahteyniñ apis etüv müddetini avgustnıñ 7-ne qadar uzattı. Böylece, Qırımda «diversiyalar» teşkil etkeninde qabaatlanğan Zahtey 11 ay ve 28 kün devamında azatlıqtan matum qalacaq. Bunı Qırım.Aqiqatqa mabusnıñ advokatı Aleksey Ladin haber etti.

Rus taqiqatçısınıñ talabını advokat böyle añlattı: «Taqiqatçı nevbetteki sefer, Zahtey «şaatlarnı tehdit etmege devam ete bilecegini» ayttı. İmaye, mantıqlı sual berip, «ne vaqıt o tehdit etmege başlağan edi» dep sorağanda, iç bir cevap berilmedi. Dediler ki, Zahtey, Ukraina vatandaşı olıp, taqiqat organlarından ve mahkemeden gizlenmek mümkün olağanını tüşünmek içün esas bar».

Ladinniñ sözlerine köre, bu qararğa qarşı itiraz bildirilecek, bu ise İnsan aqları boyunca Avropa mahkemesine muracaat etmek içün kerek olğan tedbirdir.

Rusiye taqiqatınıñ iddiasına köre, Yevgeniy Panov ve Andrey Zahtey, «diversantlar» taqımında olıp, Qırımda teraktlar yapmaq içün Sivaş gölü üzerinden Ukrainanıñ qıtaiy qısımından yarımadağa keçkenler. Rusiye mahsus hızmetleriniñ bergen malümatlarına köre, Üç Cılğa (Suvorovo) köyü civarında, eşyalarını sağlağan gizli yede, ukrainliler tutılğanda eki Rus zabiti elâk olğan.

FSB dey ki, Yevgeniy Panov ve Andrey Zahteyniñ ekisi de öz qabaatlarını qabul etti, lâkin mabuslar, prokuraturağa muracaat yollap, «itiraf ifadeleri» qıynavlar neticesinde berilgenini beyan etti. Zahtey Qırımda taksi aydayıcısı olıp çalışa edi. Panov, sıñırdaki kiriş noqtasından, eki tarafnıñ da talaplarına riayet etip, yarımadağa kirmege istegeni, amma Rusiye FSB hadimleri tarafından tutılğanını ayta.

Ukraina akimiyeti Rusiye tarafından ukrainlilerge atılğan qabaatlarnı red ete ve bu iddialarnı rusiye mahsus hızmetleriniñ «provokatsiyası» olaraq tanıy.

XS
SM
MD
LG