Link açıqlığı

Putin prezident saylâvları Qırım iştilâsı qayd etilecek künge avuştırılğanı aqqındaki qanunnı imzaladı


Vladimir Putin

Rusiye prezidenti Vladimir Putin prezident saylâvlar kününi Qırımnıñ istilâsı qayd etilecek 2018 senesi martnıñ 18-ne avuştırğanı aqqındaki qanunnı imzaladı. Bu aqta Kremlniñ saytında haber etilmekte.

«Vladimir Putin «Rusiye Federatsiyası Prezidentiniñ saylâvı aqqındaki» qanunğa deñişmeler kirsetilüvi aqqındaki Federal qanunnı» imzaladı, – denilmekte haberde.

Daa evel mayıs ayında prezident saylâvları Qırımnıñ istilâsı qayd etilecek 2018 senesi martnıñ 18-ne avuştırılacağını Devlet duması ve Federatsiya Şurası taqdir etken ediler.

2014 senesi martniñ 16-nda Qırım ve Aqyarda yarımadanıñ statusı boyunca dünyada tanılmağan referendum keçirildi ve bunıñ neticesi olaraq Rusiye Qırımnı özüne qoşıp aldı. Ukraina, Avropa birligi ve AQŞ bu rey berüvni tanımadı. Martnıñ 18-nde Rusiye prezidenti Vladimir Putin Qırım Rusiyege qoşulğanı aqqında «ilân etti».

Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG