Qırım sakinleriniñ aqlarını yarımadada qorçalağan advokat Emil Kurbedinovke Front Line Defenders mukâfatınıñ berilgeni – sadece qırımlı uquq qorçalayıcılarnıñ faaliyetine qıymet kesüv degildir, amma Rusiye içün de bir işarettir. Bunı Kurbedinoñ iyünniñ 1-nde Kyivde matbuat konferentsiyası devamında beyan etti.
«Bu Rusiye içün bir impuls, ihtar kibidir: halqara teşkilâtlar, şu cümleden Front Line Defenders, Qırımdaki vaziyetni taqip ete, uquq qorçalayıcılarnıñ işine pervasız qalmay, ve Qırımdaki eziyetlerden haberdarlar», – dedi Kurbedinov.
O dedi ki, işğal etilgen yarımadada cemaat failleri devamlı surette taqip etile.
Front Line Defenders mukâfatı er yıl, öz canını telükege atıp, cemiyette aqlarnıñ qorçalanmasına büyük isse qoşqan uquq qorçalaycılarğa taqdim etile.
2017 senesi jüri azaları finalğa 56 memleketten teklif etilgen 142 namzet arasından 5 şahısnı saylâp alğan edi. Finalğa Ukraina, Nikaragua, Vyetnam, Cenübiy Afrika ve Kuveyt vekilleri keçken edi.
Qırım yarımadası Rusiye Federatsiyası tarafından zapt etilgen soñ Emil Kurbedinov azlıqta olıp taqip etilgen qırımtatar halqınıñ vekillerini, cemaat faalleri ve jurnalistlerni qorçalamaqta. O, acele çağıruvlarğa riayet eterek, tintüv ve apiske aluvlar devamında insan aqlarınıñ bozıluvlarını da qayd ete.
2017 senesi yanvarniñ 26-nda, faal Seyran Saliyevniñ evinde tintüv ötkerilir eken, oña yardım etmek maqsadınen anda ketken arada, Bağçasarayda FSB tarafından tutula. Rayon mahkemesi onı «ekstremistik teşkilâtlarnıñ teşviq etilmesinde» qabaatlap, on künge apiske alğan edi.
