Ukraina Haber siyaseti naziri Yuriy Stets istifağa çıqacağı aqqında arizasını Ukraina Yuqarı Rada yolbaşçısı Andriy Parubiyge teslim etti. Bunı mayısnıñ 31-nde nazirlikniñ matbuat hızmeti haber etti.
«Nazir akimiyet azalarınen ve yolbaşçılarınen subetleşti ve öz qararı aqqında haber etti. İstifağa çıqmasınıñ sebebi – sağlığınıñ zayıflaşqanıdır. İç bir siyasiy ya da başqa sebepler yoq», – dedi HSN matbuat kâtibi Artem Bidenko ve şimdiki vaqıtta Yuriy Stets tedaviylenüvde bulunğanını haber etti.
Matbuat hızmetinde bildirdiler ki, Haber siyaseti naziri hastahanede bulunğan vaqıtta onıñ vazifesini nazirniñ birinci muavini Emine Ceppar eda etecek.
2015 senesi yanvarniñ 14-nde Ukraina Nazirler şurası «Ukraina Haber siyaseti nazirliginiñ işinen bağlı meseleler» aqqında qarar alğan edi. Onıñ esasında Ukraina Haber siyaseti nazirligi tesis etilgen edi.
2014 senesi dekabrniñ 2-nde, Ukraina Yuqarı Radasınıñ «Ukraina Nazirler şurasınıñ erkânı aqqında» qararına binaen, Yuriy Stets Ukraina Haber siyaseti naziri vazifesine tayin etilgen edi.
