Krmelniñ nezaretindeki Aqmescit rayon mahkemesinde qırımtatar milliy areketiniñ yetekçilerinden biri İlmi Umerovnıñ cinaiy davası boyunca mahkemeniñ azırlıq toplaşuvı ötkerildi. Bunı Qırım.Aqiqat muhbiri haber ete.
Onıñ malümatına köre, mahkeme Umerovnıñ muracaatını red etti ve advokatlardan biri – Emil Kurbedinov kelip olamağanı sebebinden toplaşuvnı başqa künge qaldırmağa razı olmadı. Davağa advokat Mark Feygin de qoşulıp olamadı.
Bundan soñ cinaiy davanıñ toqtatılması aqqında ve advokat Nikolay Polozovnı qanunsız şekilde sorğuğa çekilmesini cinaiy işniñ malümatlarından çıqarılması aqqında muracaatlar da red etildi.
Nevbetteki mahkeme toplaşuvı iyünniñ 7-ne tainlendi.
İlmi Umerovğa qarşı ekstremizm maddesi boyunca FSB tarafından cinaiy iş açılğanını 2016 senesi mayıs 12 künü Qırımnıñ sabıq prokurorı Natalya Poklonskaya beyan etken edi.
Meclis reisi muavininiñ yaqalanuvı, tintüvi ve oña qarşı cinaiy işniñ açılması, mecburiy surette mahkeme-psihiatrik ekspertizanıñ keçirilmesi içün onıñ delihanege yerleştirilmesi – cemiyette ve dünyada rezonans çıqarğan edi.
Meclis reisi Refat Çubarov, İlmi Umerovnıñ taqip etilmesini Rusiye taradından istilâ etilgen Qırımda qırımtatar halqına qarşı yapılğan aqsızlıq ve zulumnıñ bir qısımı olaraq tanıy.
Kreml nezaretindeki Aqmescit raon mahkemesiniñ resmiy sitesinde yerleştirilgen malümatqa köre, İlmi Umerovğa qarşı Rusiye Cinaiy kodeksiniñ 280.1 maddesi boyunca açılğan cinaiy dava keçende mahkemeci Andrey Kulişovğa teslim etildi.
«Mirotvorets» sitesiniñ malümatına köre, Andrey Kulişov, mahkemeci şeadetini bozğanı içün ve Ukraina CK 111 maddesini bozağanı («devlet hainligi») içün, Ukraina uquq qoruyıcı olrganları tarafından qıdırılmaqta.
Bunen beraber Ukraina Yuqarı adalet şurası tarafından işten boşatılğan qırımlı mahkemeciler sırasında Andrey Kulişovnıñ adı keçmey.
