Ukraina telüsizlik hızmetiniñ malümatlarına esaslanıp, Qırım Muhtar Cumhuriyetiniñ prokuraturası Qırımdaki devlet organları ve yerli idare organlarınıñ memurları tarafından Ukrainağa qarşı melez cenkniñ başlatılması sebebinden cinaiy dava başlattı. Bunı mayısnıñ 30-nda UTH matbuat hızmeti bildirdi.
«Ukraina cinaiy kodeksiniñ 1 q. 437 maddesi – cenk ya da arbiy davanıñ niyet etilmesi, azırlanılması ya da başlatılması, ya da böyle areketler içün yapılğan fitnede iştirak etüv iddiasında açılğan cinaiyy dava Mahkemeden evel yapılacaq taqiqatlarnıñ Yekâne cedveline kirsetildi», – dep haber etile.
Muessisede qayd ettiler ki, açılğan bu dava evelkilerine beñzemey, «çünki Rusiyeniñ Ukrainağa qarşı alıp barğan melez cenkiniñ informatsion qısımına ilk kere adliyeviy ceetten qıymat kesilecek».
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
