Link açıqlığı

Rusiye Qırım hanlığı devrini iblis sıfatına kirsete – tarihçı


Qırımlı tarihçı Sergey Gromenko Sovyetler birligi ve onıñ devamcısı olğan Rusiye, Qırım hanlığını iblis sıfatına soqaraq, Qırım «başından berli rus toprağı edi» degen statusnı isbatlamağa areket ete. Bu aqta o Qırım.Aqiqat Radiosı efirinde söz yürsetti.

«Eger o yıllardaki Qırım-Ukraina munasebetleriniñ bütünini 100%lik bir tögerek sıfatında farz etecek olsaq, bunıñ dörtte biri – sovyet ve rusiye propagandasında, Qırım hanlığınıñ Ukrainağa nisbeten keçirgen arbiy amellerinde yalıñız basqın, harabe, çaypama şeklinde qullanılğan «qara bir efsane» olacaq. Diger 25% - bu Zaporojye kazaklarınıñ öz esirlerini azat etmek, tarihiy adalet ve kazak şuretini tikleme oğrundaki qaramaniy seferleri qaplaycaq. Qalğan 50% ise, kazaklar ve qırımtatarları arasındaki birlik aqqında kimse asla añmağandır», – dey Gromenko.

Qırımğa «rusiye» toprağı statusı tamğasını basmaq içün Rusiye tarihnı özüne köre uydura, dep qayd ete tarihçı.

«Sebebi pek basit: 1944 senesi qırımtatarları sürgün etilgen soñ, 1952 senesi Aqmescitte ilimler akademiyasınıñ Birleşken sessiyası ötkerilgende, sovyet tarihşınaslıq ilmi tarafından qırımtatarları – parazit bir halq, qırım Hanlığı – aydutlar yuvası ve olardan asla bir hayır beklenmez degen fikir qabul etile. Onıñ içün, aydut qırımtatarları aqqındaki stereotip Qırım, başından berli rus toprağıdır degen efsaneniñ sureti içine uzviy bir şekilde işlengendir», – dep ikâye ete tarihçı.

«Qırım-Ukraina munasebetleri em yahşı, em yaramay taraftan doğru, tüşünceli, er taraflama talil etilmegence bu efsaneniñ red etilmesi imkânsızdır. İşte böyleliknen ögümizde, müstesna olğan yahşı ruslarnen pek yaramay qırımtatarlarını köremiz ki, bundan soñ Rusiye Qırımnı zapt etmesiniñ aqlanmasına bir adım qala», – dep qayd ete Gromenko.

Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG