SBUnıñ «Yandex» kompaniyası menegmenti qanunğa uymağan şekilde ukrain vatandaşlarınen bağlı malümatnı toplap, Rusiyege yollağanınen bağlı malümat qabaatlavlarını red etmekte.
«Ne «Yandex-Ukraina» hadimleriniñ, ne de Ukrainadaki şubesi yolbaşçılarınıñ «Yandex» qullanıcılarınıñ şahsiy malümatına dair qısmına kirmege aqqı yoq. Qullanıcılarımıznıñ şahsiy malümatlarını qorçalamaq meselesi, bizler servis bergen bütün devletlerde eñ birinci yerde turmaqta. Hususan, bunıñ temin etilmesi içün, qullanıcılar aqqındaki malümat şahsiyetsizlendirilgen ve anonimdir», – denile kompaniyanıñ matbuat hızmeti bergen beyanatta.
«Uquq qorçalav organları kompaniyağa kerek olğan bazı malümatlarnı açıp berilmesinen bağlı muracaat yapmasınıñ resmiy bir usulı bardır, ve bunuñ içün mahkemeniñ mütenasip qararı olmalıdır, kompaniyanıñ özü de buña esas bardır dep saymalıdır. «Yandex» malümat yollay degen qabaatlavlar esassızdır», – dep ilâve ete «Yandex» temsilcileri.
Kompaniya yüz bergen vaqialar hususında yuristlernen mesleatlaşqanları aqqında bildirmekte.
Ukraina havfsızlıq hızmeti bildirgenine köre, mayısnıñ 29-nda «Yandex»te keçirilgen tintüvler, kompaniyanıñ menegmenti qanunğa uymağan şekilde ukrain vatandaşlarınen bağlı malümatnı toplap, Rusiyege yollay eken.
Daa evel mayısnıñ 29 bazaertesi künü Ukraina havfsızlıq hızmeti rusiyeli «Yandex» kompanyasınıñ terkibindeki Kyiv ve Odessa şubeleriniñ ofislerinde tüntüvler keçirgeni aqqında bildirgen edi.
Taqiqat işleri Ukraina Cinayet kodeksiniñ 111 maddesine binaen (Vatan hainligi) cinaiy iş çerçivesinde ötkerilmekte, dep bildire muessiseniñ temsilcisi. «Yandex» kompanyası taqiqat keçirilgenini tasdıqalay, lâkin hadimlerniñ işbu taqiqatnıñ sebebinden haberi yoq.
Mayısnıñ 15-nde Ukraina prezidenti Pötr Poroşenko öz emirinen Ukraina milliy telükesizlik ve mudafaa Şurasınıñ, Rusiyeli bazı vatandaşlar ve şirketlerine nisbeten yañı sanktsiyalar kirsetmekni közde tutqan qararını küçke kirsetti. Bu cedvelge kirgen 468 şirket arasında, hususan «Yandex» servis hızmeti, «VKontakte» «Odnoklassniki» ictimaiy ağları da bardır. Qararğa istinaden, internet-provayderler añılğan internet-resurs kirişlerini blok etmege mecburlar.
