Ukraina havfsızlıq hızmeti bildirgenine köre, mayısnıñ 29-nda «Yandex»te keçirilgen tintüvler, kompaniyanıñ menegmenti qanunğa uymağan şekilde ukrain vatandaşlarınen bağlı malümatnı toplap, Rusiyege yollay eken.
Ukrain devlet muessisesiniñ matbuat hızmeti bildirgenine köre söz, şahsiy malümat, faaliyet saası, ayat tarzı, yaşağan yeri, işi, işten boş vaqtı, qazanç yolu, elektron adresi ve ictimaiy ağlardaki akkauntları aqqında ketmekte.
SBU bergen malümatqa binaen, malümatı Rusiye yollanğan vatandaşlar arasında uquq qorçalama ve hususiy organlarnıñ, Ukraina Silâlı quvetleriniñ arbiyleri, Ukraina şarqında terrorizmge qarşı keçirilgen operatsiyalarda iştirak etken diger şubelerniñ, devletniñ idare ve akimiyet organlarında çalışqan hadimlernen bağlı malümatlar da bar eken.
«Malümat bizim ülkemizde planlaştırma, keşif areketleri, diversiya, informatsion ve patlav operatsiyaları teşkil etüv ve ötkeriv maqsadınen Rusiye Federatsiyasınıñ hususiy hızmetlerine yollanmaqta edi», – dep qayd ete devlet hızmetiniñ temsilcileri.
«Yandex» kompanyasında işbu taqiqat areketlerine iç bir izaat berilmedi.
Daa evel mayısnıñ 29 bazaertesi künü Ukraina havfsızlıq hızmeti rusiyeli «Yandex» kompanyasınıñ terkibindeki Kyiv ve Odessa şubeleriniñ ofislerinde tüntüvler keçirgeni aqqında bildirgen edi.
Taqiqat işleri Ukraina Cinayet kodeksiniñ 111 maddesine binaen (Vatan hainligi) cinaiy iş çerçivesinde ötkerilmekte, dep bildire muessiseniñ temsilcisi.
«Yandex» kompanyası taqiqat keçirilgenini tasdıqalay, lâkin hadimlerniñ işbu taqiqatnıñ sebebinden haberi yoq.
Mayısnıñ 15-nde Ukraina prezidenti Pötr Poroşenko öz emirinen Ukraina milliy telükesizlik ve mudafaa Şurasınıñ, Rusiyeli bazı vatandaşlar ve şirketlerine nisbeten yañı sanktsiyalar kirsetmekni közde tutqan qararını küçke kirsetti. Bu cedvelge kirgen 468 şirket arasında, hususan «Yandex» servis hızmeti, «VKontakte» «Odnoklassniki» ictimaiy ağları da bardır. Qararğa istinaden, internet-provayderler añılğan internet-resurs kirişlerini blok etmege mecburlar.
