Kreml kontrol etken Aqmescit rayon prokuraturasınıñ hadimleri İvanov bir vatandaşınıñ qırımtatar areketiniñ failleri mayısnıñ 18-nde qırımtatar sürgünliginiñ qurbanlarını añma kününde «Rusiyege qarşı aktsiyalar» keçirecegine dair arizası olğanını bildireler.
Bunı Şevket Qaybullayev Radio Svoboda mühbirine bildirdi. Onı mayısnıñ 17-nde «kütleviy tedbirlerniñ teşkil etmemesi» aqqında tenbiyelediler. Aynısı İlmi Ümerov, Nariman Celâlov ve Lemmar Yunusovğa aytıldı.
«Meni rayon prokuraturasına davet etip, İvanov biri Meclis Rusiyege qarşı aktsiyalar azırlağanını bildire, dep ayttılar. Arizada olğan soyadlar arasında menimki de bar eken. Men arizanı köstermege talap ettim, amma razı olmadılar. «Apiske alıñız aysa» aytqanlarımdan soñ politsiyanen qorquzmağa başladılar, soñ adiy bir urbada birisi kirip, arizanı seslendirmege razı oldı. Men bir de bir kütleviy tedbirni teşkil etmeycegimizge dair ariza yazdım», – dep tarif etti Qaybullayev.
Er yıl Qırımda sürgün munasebetinen, şu cumleden Qırım paytahtında matem mitingi olmaq üzre, kütleviy tedbirler ötkerile edi. Lâkin 2014 senesi mart ayında yarımadanı Rusiye zapt etken soñ, Aqmescit merkezinde böyle bir tedbirlerniñ keçirilmesi yasaqlandı.
Rusiye Qırımnı işğal etken soñ yarımadada mustaqil jurnalistler, cemaat failleri, Rusiyede yasaq etilgen «Hizb ut-Tahrir» teşkilâtınen bağlı olğanlarında şeklengen Qırım musulmanları, qırımtatar Milliy areket failleri, Meclis azalarınıñ evlerinde tintüvler sıqlaştı.
18 mayıs künü Ukrainada memorial tedbirlerniñ keçirilmesi planlaştırıla. Er yıl bu künü tamır halq 1944 senesi yarımadadan Orta Asiyağa sürülgeninen bağlı facialı vaqialar hatırlana. Episi olıp 180 bin insan sürülgen edi.
Ukrainada qırımtatarlarınıñ sürgüni genotsid dep tanıldı.
