Link açıqlığı

«KrımSOS»: qırımlılar biometrik pasportlarnı faal sürette soraylar


«KrımSOS» cemaat teşkilâtınıñ failleri qayd ete ki, Ukraina ve Avropa Birligi arasında vizasız rejim qararı qabul etilgen soñ qırımlılar biometrik pasportnı alma esnasını faal sürette soramağa başladı. Bunı «KrımSOS» cemaat teşkilâtınıñ koordinatorı Tamila Taşeva Qırım.Aqiqatqa bildirdi.

«Ukraina akimiyeti biometrik pasportlarnıñ alınmasında mania olmasa ve qırımlılarğa yahşı yanaşsa, işğal etilgen topraqlarda yaşap, dünyanıñ o qısımlarına barıp olamağan insanlarnıñ yolları açılır. Qırımlılar buña müsbet yanaşır, Ukrainağa daa da çoq bağlı olurlar», – dep tüşüne Taşeva.

Mayısnıñ 17-nde Strasburgdaki Avropa parlamenti binasında Ukraina vatandaşlarınıñ Avropa Birligine vizasız seyaat etmelerine dair qarar imzalandı.

İşbu qararnı Avropa parlamentiniñ prezidenti ve Avropa Birligi Şurasında Maltı reisliginiñ vekili imzaladılar.

Viza rejiminiñ serbestleşmesi añlaşması Büyük Britaniya, İrlandiyadan ğayrı, Avropa Birliginiñ bütün memleketlerinde olacaqtır. Em de Avropa Birligine kirmegen şengen alanınıñ memleketlerinde çalışacaq: Norvegiya, İslandiya, Lihtenşteyn ve İsviçrede.

XS
SM
MD
LG