Link açıqlığı

Qırımtatarlarğa dünya memleketleriniñ paytahtlarında temsilciliklerni tesis etmege teklif ettiler


Ukrainada Litvaniya elçisi Marius Yanukonis qırımtatarlarnıñ timsaliy temsilciliklerini dünya paytahtlarında – Washington, Berlin ve digerlerinde – tesis etmege teklif etti. Bunı o, mayısnıñ 29-nda, Litvaniya seyminde keçirilgen «Qırımtatarlar 3 yıllıq işğalden soñ» adlı halqara konferentsiyada iştirak etip ayttı, dep bildirdi konferentsiya iştirakçisi, jurnalist Yuriy Lukanov Qırım.Aqiqatqa.

ABD Litvaniyanıñ sabıq elçisi Zigmantas Pavilyonis konferentsiyada bu teklifke qoltutıp, «Qırımda qırımtatarlarnıñ vaziyetini añlatacaq haber merkezleri» olmalı, dep qayd etti.

Onıñ aytqanına köre, noyabrniñ 7-nde Amerika Birleşken Devletlerinde kommunizm qurbanlarına bağışlanğan tedbirler keçirilmeli. O, qırımtatarlarnı «kommunizm qurbanları» olaraq adlandırıp, «böyle bir fursattan faydalanıp, anda prezentatsiyanı keçirmek kerekler», dep qayd etti.

Bazarertesi künü Litvaniya tışqı işler naziri Linas Linkeviçus Vilnüste keçirilgen «Qırımtatarlar Qırım işğalinden üç yıl keçken soñ: şimdiki vaziyet ve halqara toplulıq içün ilerideki strategiya» halqara konferentsiyasında çıqışta bulunıp, Litvaniya Rusiye işğal etken Qırım sakinlerine qoltutmağa devam etip, Rusiye Federatsiyasından yarımadada insan aqlarınıñ bozulmasını toqtatmağa talap etkenini bildirdi.

Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG