«Yandex» kompanyası temsilcileri ofislerinde tintüvler keçirilgenini tasdıqladı, lâkin sebeplerinden haberi olmağanlarını bildirdi.
«Bügün SBU yapqan areketleriniñ sebeplerinen bağlı bir malümatımız yoq, bizim uquqçılar ofislerimizge keteler. «Yandex» ukrain qanuniy protseduralarına istinaden Ukrainada yapqan bütün işleri aqqında malümat bermege azır», – dep ayttı Azatlıq Radiosına «Yandex» matbuat hızmetiniñ temsilcisi Asya Melkumova.
Daa evel mayısnıñ 29 bazaertesi künü Ukraina havfsızlıq hızmeti rusiyeli «Yandex» kompanyasınıñ terkibindeki Kyiv ve Odessada şubeleriniñ ofislerinde tüntüvler keçirgeni aqqında bildirgen edi.
Taqiqat işleri Ukraina Cinayet kodeksiniñ 111 maddesine binaen (Vatan hainligi) cinaiy iş çerçivesinde ötkerilmekte, dep bildire muessiseniñ temsilcisi.
«Yandex» kompanyasında işbu taqiqat areketlerine iç bir izaat berilmedi.
Mayısnıñ 15-nde Ukraina prezidenti Pötr Poroşenko öz emirinen Ukraina milliy telükesizlik ve mudafaa Şurasınıñ, Rusiyeli bazı vatandaşlar ve şirketlerine nisbeten yañı sanktsiyalar kirsetmekni közde tutqan qararını küçke kirsetti. Bu cedvelge kirgen 468 şirket arasında, hususan «Yandex» servis hızmeti, «VKontakte» «Odnoklassniki» ictimaiy ağları da bardır. Qararğa istinaden, internet-provayderler añılğan internet-resurs kirişlerini blok etmege mecburlar.
Bu qarar zıt reaktsiya doğurdı. Hususan Human Rights Watch adlı halqara uquq teşkilâtı, yasaqnı lâğu etmek kerek olğanını qayd eterek, Ukrainada söz ve informatsiya serbestligini qorçalamaq içün çareler qabul etilmeli, dep bildirdi. NATO ise, Rusiye internet-resurslarınıñ blok etilmesi söz serbestligini bağlı degil de, havfsızlıq maqsadınen yapılğanını bildirip, Kyivniñ noqtayi nazarınen razı oldı.
