Qırımtatar milliy areketiniñ iştirakçisi Ahtem Çiygoz davasınıñ Kreml kontrol etken Qırım Yuqarı mahkemesinde zarar körgen Anatoliy Solovyev oña million ruble (17 biñ dollardan ziyade) körgen «maneviy zararı» içün tazminat olaraq berilmesini istedi. Bunı mayısnıñ 29-nda Qırım.Aqiqat mühbiri bildire.
Solovyev tazminat miqdarınıñ sebebini añlatıp olamdı.
«Çiygoz davasınıñ» mahkemesinde zarar körgen Solovyev ekinci kere sorğuğa çekildi.
Birinci sorğuda zarar körgen kişi Çiygoznı körmegenini, onıñ areketleri aqqında bir şey bilmegenini qayd etken edi. Qırım parlamentiniñ binası ögündeki vaqialar vaqtında «Qırım samooboronasında» edi, qırımtatarlarnı Yuqarı Radağa kirsetmemege tırışqan edi, üyle yemegine çıqqanda ise gaz balonını körip qapattı, dep bildirdi. Bundan soñ esini coyıp, 6 künden soñ veteranlar hastahanesinde özüne keldi.
Ahtem Çıygoz 2015 senesi yanvar ayında 2014 senesi fevralniñ 26-da Qırım Yuqarı Şurasınıñ binası ögünde Ukrainanñ territorial bütünligine qol tutulmasına bağışlanğan mitingde iştirak etkeni içün tutulğan edi. O zaman miting iştirakçılerine Rusiye tarafdarları, şu cumleden «Russkoye yedinstvo» firqasınıñ temsilcileri qol tutqan edi.
«Çiygoz davasını» Rusiye mahkemesi qapalı toplaşuvda: qırımtatar Meclisi yolbaşçısınıñ muavini sıfatındaki Ahtem Çiygozniñ davası olaraq ve ayrıca, davanıñ eki iştitakçisi olğan Ali Asanov ve Mustafa Degermenci davası şeklinde ekige ayıraraq, «26 fevral» davası çerçivesinde baqmaqta.
