2017 senesi mayıs ayında «Bizim balalar» fondu qırımtatar siyasiy mabüsleriniñ balalarına 5-er biñ ruble berecek ola. Bunı «Bizim balalar» fondunıñ azası Elzara İslâmova «Qırım birdemliginiñ» toplaşuvında ayttı, dep haber ete Qırım.Aqiqat.
«Bu ay da balalarğa beşer biñ ruble ayıramız. Hasta balalarğa daa ziyade para berecekmiz. Bir balağa oña kerek olğan donatma satın alamız», – dedi Elzara İslâmova.
Onıñ qayd etkenine köre, siyasiy mabüslerniñ balalarınen fondnıñ psihologı çalışa. Eñ yaqın vaqıtta «Bizim balalar» Bağçasaray ya da Qarasuvbazarda balalar içün bayram yapmağa planlaştıra.
«Bizim balalar» leyhası keçken sene mubarek Ramazan ayında başlatılğan edi. Leyha teşebbüsçisi jurnalist Lilâ Bucurova oldı. Onıñ maqsadı – Qırımnıñ siyasiy mabüsleri ve ğayıp olğan ya da qaçırılğan qırımtatarlarnıñ qorantalarına yardım etmektir.
Leyha yalıñız maddiy yardımnı qabul etmey. Leyha çerçivesinde siyasiy taqiplerge oğrağan insanlarnıñ balalarına yardım kösterile: para, urba ve oyuncaqlar, raatlıq ve tedaviylev, psihologik yardım ve ilâhre.
