Qırımtatar milliy areketiniñ yetekçilerinden biri İlmi Umerov, Qırımnıñ Ukraina nezaretine qaytarılması içün SSCB dağılğanda qabul etilgen Rusiyeniñ sıñırları ğayırlan tiklenilmek kerek olğanını tüşüne. Bunı Umerov mayısnıñ 29-nda öz Facebook saifesinde yazdı.
«Mayısnıñ 31-nde Aqmescit rayon mahkemesinde saat 11.00 menim cinaiy davamnıñ mahkeme ceryanı başlatılacaq. Men 2014 senesiniñ referendumını ve soñraki qoşuluvnı qabul etmeyim. Qırımnı vaqıtınca işğal etilgen topraq, Rusiyeni ise Ukrainağa nisbeten istilâcı-devlet olaraq qabul etken BM Baş Assamlesınıñ rezolütsiyasına qol tutam. Zanımca, şimdiki vaqıtta meseleniñ tek bir çezüv yolu bardır – SSCB dağılğanda 1991 senesi Ukraina ve Rusiye arasında qabul etilgen sıñırlar ğayırdan tiklenilmeli», – dep yazdı Umerov.
İlmi Umerovğa qarşı ekstremizm maddesi boyunca FSB tarafından cinaiy iş açılğanını 2016 senesi mayıs 12 künü Qırımnıñ sabıq prokurorı Natalya Poklonskaya beyan etken edi.
Meclis reisi muavininiñ yaqalanuvı, tintüvi ve oña qarşı cinaiy işniñ açılması, mecburiy surette mahkeme-psihiatrik ekspertizanıñ keçirilmesi içün onıñ delihanege yerleştirilmesi – cemiyette ve dünyada rezonans çıqarğan edi.
Meclis reisi Refat Çubarov, İlmi Umerovnıñ taqip etilmesini Rusiye taradından istilâ etilgen Qırımda qırımtatar halqına qarşı yapılğan aqsızlıq ve zulumnıñ bir qısımı olaraq tanıy.
Kreml nezaretindeki Aqmescit raon mahkemesiniñ resmiy sitesinde yerleştirilgen malümatqa köre, İlmi Umerovğa qarşı Rusiye Cinaiy kodeksiniñ 280.1 maddesi boyunca açılğan cinaiy dava eki kün evelsi mahkemeci Andrey Kulişovğa teslim etildi.
«Mirotvorets» sitesiniñ malümatına köre, Andrey Kulişov, mahkemeci şeadetini bozğanı içün ve Ukraina CK 111 maddesini bozağanı («devlet hainligi») içün, Ukraina uquq qoruyıcı olrganları tarafından qıdırılmaqta.
Bunen beraber Ukraina Yuqarı adalet şurası tarafından işten boşatılğan qırımlı mahkemeciler sırasında Andrey Kulişovnıñ adı keçmey.
