Kreml işğal etilgen Qırımnı arbiy bazağa çevirdi. Bu sebepten yarımadanı cenk yolunen qaytarmağa pek telükeli. Bunı qırımtatarlarnıñ lideri, Ukraina halq deputatı Mustafa Cemilev UA.TV intervyüsında ayttı.
«Qırım arbiy bazağa çevirildi, 6 nükleer başlığı bar olğanına dair malümatımız bar. Bu sebepten anda cenkke başlamaq pek telükelidir», – dedi Cemilev.
Onıñ aytqanına köre, yarımadada cenk olsa, Çeçenistanda olğanı kibi etnik öldürüvler ola bile.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
