Qırımnıñ cenübiy-şarqiy tarafını suvnen teminlegen Qarasuvbazar suv anbarısuvğa toldı. Bunı o yerni ziyaret etken Qırım.Aqiqat muhbiri haber ete.
Suv kölemi baarniñ salqınlığı ve Qırımda yağğan yağmurlardan arttırdı. Neticede atta tereklerniñ tamırları suv tübünde qaldı.
Yerli sakinler bu suv anbarınıñ dambasını qasevet eteler. Çoq vaqıt devamında suv olmağanda damba biraz çökti. Bundan evel Qırım.Aqiqat yazğan edi ki, bent üzerinde büyük ve teren aralar körüne, tamir işeri ise yapılmay.
Aynı zamanda, Qarasuvbazar rayonındaki «Taygan» arslanlar bağçası suvsız qalmaqta.
« Qarasuvbazar suv anbarı toldı, amma bizim suvımız Taygan suv anbarından alına – anda suv kelmedi, bu sebepten «Taygan» arslanlar bağçasında suv meselesi mürekkep qalmaqta. Yağmurlar yağğanda – çaresini tapamız, bağçadaki ösümliklerni suvarmağa kerek degil. Şimdi Qarasuvbazar suv anbarından suvnı keçirmek leyhasını azırlaymız, amma mesafe uzaqlıüından sebep bu pek paalığa çıqa», – dedi Qırım.Aqiqatqa arslanlar bağçasınıñ saibi Oleg Zubkov.
Qarasuvbazar suv anbarı dağlardaki Qarasuv-Başı özeninden suv ala, o ise Qırımnıñ eñ büyük yaylası – Qarabiy yaylasından beslene.
