Link açıqlığı

Qırımda fail Adilovğa qarşı taqiqat işleri yekünlendi – advokat


Aqmescitteki Kiyev rayon Taqiqat komitetiniñ Rusiye idaresinde fail Bilâl Adilovğa qarşı taqiqat işleri soñuna keldi, onı akimiyet vekiline qarşı zorbalıq qullanması ve telükege oğratmasında qabaatlaylar. Bunı Qırım.Aqiqatqa bergen izaatında advokat Edem Semedlâyev mayısnıñ 26-nda haber etti.

«Adilovğa qarşı taqiqat işleri yekünlendi ve, cinaiy kodeksiniñ 217 maddesine binaen, bizge cinaiy işniñ malümatı taqdim etildi. O eki cılttan ibaret, içinde zarar körgenlerniñ, şaatlarnıñ ifadeleri, eki ekspertiza ve başqa taqiqat tedbirleriniñ protokolları mevcut», – dedi advokat.

Bundan soñ, ceryanğa köre, taqiqatçı qabaat iddianamesini azırlap onı prokuraturağa yollamalı. Prokuraturanen uyğulanğan malümat mahkemege teslim etilcek, dep añlattı Semedlâyev.

Martnıñ 29-nda Kreml kontrol etken Qırım Yuqarı mahkemesiniñ binası yanında belgisiz insanlar Bilâl Adilovnı qaçırğan edi.

Video çıqarğan şaatnıñ telefonını yerge atıp, Adilovnı mikroavtobusqa mindirip alıp kettiler. Soñra belli oldı ki, onı Qırımdaki Taqiqat komitetiniñ Rusiye idaresine ketirgenler.

Kreml kontrol etken Aqmescitniñ Kiyev rayonı mahkemesi Bilâl Adilovnı azat etmege qarar çıqardı. Taqiqatçınıñ apis cezasını berme muracaatı red etildi. Al-azırda Bilâl Adilov çıqmamaq şartı altında qala.

Rusiye Qırımnı işğal etken soñ yarımadada mustaqil jurnalistler, cemaat failleri, Rusiyede yasaq etilgen «Hizb ut-Tahrir» teşkilâtınen bağlı olğanlarında şeklengen Qırım musulmanları, qırımtatar Milliy areket failleri, Meclis azalarınıñ evlerinde tintüvler sıqlaştı.

Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG