Qırımtatar Milliy Meclis reisi Refat Çubarov Ukraina musulmanlarını Ramazan ayınıñ başlanmasınen hayırladı. Öz tileklerini o Facebook saifesinde yerleştirdi.
«İslâm dinini kütken bütün ukrain vatandaşlarına – alğan niyetlerine irişmelerini, cısmen ve ruhen oraza tutmalarını, raat ve hayırhaq munasebetlerde olğan adamlarnıñ artmasını tileyim», – dedi Meclis reisi.
Çubarov, bu ay devamında «qırımtatar halqınıñ tarihiy Vatanı rus istilâcılarından azat olması içün» ve Ukrainanıñ topraq bütünligi ğayırdan tiklenmesi içün dua etecegini yazdı.
Ramazan ayı – bütün msulmanlar içün müim ve muqaddes aydır.
Ramazan ayı bitkeninen musulmanlar Oraza-Bayramını qayd etler. Bu künü muminler bayram namazını qılalar, eñ güzel urbalarını kiyip, ananeviy yemekler azırlap, sofralar donatalar, qomşu, soy-sop ve dostlarnı musafirlikke davet eteler, özleri de musafirlikke barıp, ediyeler bahşıl eteler ve bayram müitinen sevindireler.
