Mayısnıñ 26-nda Dublinde Front Line Defenders mukâfatınen taqdirlengen qırımlı advokat Emil Kurbedinov onı, istilâ altındaki Qırımda insan aqlarını imaye etüvde bir qorçalav vastası olaraq qullanması mumkün. Bu aqta Qırım.Aqiqatqa bergen izaatında Ukrainadaki Amnesty International müdiri Oksana Pokalçuk söz yursetti.
«Bu mukâfat - bir qorçalav vastası kibidir, çünki advokat ya da taqiqat esnasında bulunğan insannıñ ayatı, ya da ğayıp olğan insan artından ne qadar çoq taqip etilse – demek ki, devlet o insannı ne gizlep, ne de aqlarını bozup olamaycaq ve mesuliyetli olacaqtır degen manağa kele», – dep izaatladı Pokalçuk.
O, berilgen mukâfat Qırımda insan aqları bozulğanı meselesine bir daa diqqat çekelecegini ayrıca qayd etti.
Front Line Defenders mukâfatı er yıl, öz canını telükege atıp, cemiyette aqlarnıñ qorçalanmasına büyük isse qoşqan uquq qorçalaycılarğa taqdim etile.
2017 senesi jüri azaları finalğa 56 memleketten teklif etilgen 142 namzet arasından 5 şahısnı saylâp alğan edi. Finalğa Ukraina, Nikaragua, Vyetnam, Cenübiy Afrika ve Kuveyt vekilleri keçken edi.
Qırım yarımadası Rusiye Federatsiyası tarafından zapt etilgen soñ Emil Kurbedinov azlıqta olıp taqip etilgen qırımtatar halqınıñ vekillerini, cemaat faalleri ve jurnalistlerni qorçalamaqta. O, acele çağıruvlarğa riayet eterek, tintüv ve apiske aluvlar devamında insan aqlarınıñ bozıluvlarını da qayd ete.
2017 senesi yanvarniñ 26-nda, faal Seyran Saliyevniñ evinde tintüv ötkerilir eken, oña yardım etmek maqsadınen anda ketken arada, Bağçasarayda FSB tarafından tutula. Rayon mahkemesi onı «ekstremistik teşkilâtlarnıñ teşviq etilmesinde» qabaatlap, on künge apiske alğan edi.
