Link açıqlığı

Qırımlı advokat Emil Kurbedinov İrlandiyada halqara uquq qorçalayıcı mukâfatınen taqdirlendi


Emil Kurbedinov, arhivden alınğan resim

Qırımlı advokat Emil Kurbedinov mayısnıñ 26-nda İrlandiyanıñ paytahtı Dublinde telükede bulunğan uquq qorçalayıcılar içün tesis etilgen Front Line Defenders teşkilâtınıñ mukâfatına nail oldı. Bu haber teşkilâtnıñ sitesinde yayınlanğan.

Taqdirlev merasiminde Kurbedinov: «Bu mukâfat – Qırımdaki bütün uquq qorçalayıcılarnıñ muvafaqiyetidir. Olar öz semetdeşleriniñ aqlarını qorçalamaq içün ayaqlandılar», – dep aytqan.

Uquq qorçalayıcı: «Yarın ne olacağını bilmeymiz, amma bir şeyni bilemiz: öz aqlarımıznı barışıq yolunen qorçalamağa mecburmız», – dedi.

Front Line Defenders mukâfatı er sene, öz canlarını telükege atıp, cemiyette aqlarnıñ qorçalanmasına büyük isse qoşqan uquq qorçalayıcılarğa taqdim etile.

2017 senesi jüri azaları 56 memleketten teklif etilgen 142 namzetten 5 şahısnı finalğa seçken edi. Finalğa Ukraina, Nikaragua, Vyetnam, Cenübiy Afrika ve Kuveyt vekilleri keçken edi.

Qırım yarımadası Rusiye Federatsiyası tarafından istilâ etilgen soñ Emil Kurbedinov cemaat faallerini, jurnalistlerni ve, azlıqnı teşkil etkeni alda, taqip etilgen qırımtatar halqınıñ vekillerini qorçalamaqta. O, acele çağıruvlarğa cevaplanıp, tintüv ve apis etüvler devamında insan aqlarınıñ bozuvını qayd ete. 2017 senesi yanvarniñ 26-nda, Seyran Saliyevte tintüv ötkerilgende oña yardım etmek içün evine yol tutqanda, Bağçasarayda FSB tarafından tutılğan edi. Rayon mahkemesi onı «ekstremistik teşkilâtlarnıñ teşviq etilmesinde» qabaatlap, on künge apiske oturtqan edi.

XS
SM
MD
LG