Link açıqlığı

Bir yıl evelsi esir etilgen İbragimovnıñ evinde dua merasimi ötkerildi


Bir yıl evelsi qaçırılğan qırımtatarı Ervin İbragimovnıñ evinde, mayısnıñ 24-nde aqşam cemaat ile dua merasimi ötkerildi. Yarımadanıñ çeşit regionlarından onlarnen adamlar kelip, Ervin İbragimovnıñ ve qaçırılğan başqa semetdeşlerniñ qaytmaları içün, em de qanunsız surette apis etilgenlerniñ azatlığı içün dua ettiler. Bunı Facebookta Qırımtatar Milliy Qurultayınıñ MSK reisi Zair Smedlâyev haber etti.

Qırımtatar milliy areketiniñ yetekçilerinden biri İlmi Umerov, dua başlanmazdan yurdaşlarına hitaben muracaat etti.

Kyivde mayısnıñ 24-nde «CrimeaSOS» teşkilâtı, qırımlı Ervin İbragimovnıñ qaçırılmasından bir yıl keçkeni munasebetinen Rusiyeniñ Ukrainadaki elçihanesi qarşısında aktsiya teşkil etti.

Dünya qırımtatar kongressi icra şurasınıñ azası Ervin İbragimov 2016 senesi mayısnıñ 24-de Bağçasarayda belgisiz insanlar tarafından qaçırıldı. Video nezareti kamerası Rusiye yol inspektorları urbasında eki adam İbragimovnıñ maşinasını toqtatıp, onı mikroavtobusqa oturtqanını qayd etti.

Qırım işğalinden soñ yarımadada insanlarnıñ, ekseriyeti qırımtatarlarnıñ, ğayıp olma adiseleri sıqlaştı. Bunen beraber Rusiyeniñ Qırımdaki Taqiqat komiteti tasdiqlay ki, «qırımtatarlarnıñ büyük sayıda ğayıp olması qayd etilmey».

Qırım uquq qorçalayıcı gruppasınıñ tahminlerine köre, insanlar Rusiye akimiyeti ya da onıñ kontroli altında bulunğan taqımlar tarafından qaçırıla bile. Qırım akimiyeti insanlarnıñ ğayıp olmasını tanıy, amma onıñ alâqası bar olğanını inkâr ete.

XS
SM
MD
LG