Link açıqlığı

Viyanada ötkerilgen toplaşuvda OPEC teşkilâtınıñ azası olğan devletler, çıqarılacaq cermaynıñ kölemi eksiltilecegi aqqında muqaveleni kelecek sene mart ayına qadar uzatmağa añlaştılar. Bunı Reuters agentligi haber ete.

Muqaveleniñ uzatılması OPEC teşkilâtına kirmegen devletlernen, şu cümleden Rusiyenen de uyğunlaştırıldı. Keçken sene noyabr ayında soñki aman-aman on yıl devamında ilk kere çıqarılacaq cermay köleminiñ azlaştırılması aqqında añlaşma qabul etilgen edi. Bu aqta muzakereler bundan ögüne eki yıl devamında alıp barıla edi.

Muqavelege binaen, OPEC devletleri künde çıqarılacaq cermaynıñ kölemini 1,2 million varilge eksiltecek. İtifaqqa kirmegen devletler künde 600 biñ varilge eksik cermay çıqara bilecek.

Halqara OPEC teşkilâtı cermay çıqaruvınıñ kvotalarını nezaret etmek içün meydanğa ketirilgen edi. Aralarında Saudiy Arabistan, Qatar ve İran olğan OPEC aza-devletleri dünyadaki cermaynıñ 2/3 qısımına saip çıqa. Rusiye teşkilâtqa kirmey, lâkiy teşkilâtnıñ daimiy nezaretçisi olmaqta.

XS
SM
MD
LG