Link açıqlığı

«Çiygoznıñ davasında» şaat: demir parçaları, plastik şişeler ve gaz Rusiye tarafdarı olğanlarnıñ elinde edi


Kremlniñ nezaretinde çalışqan Qırım Yurarı mahkemesi «Çiygoznıñ davasında» 118-nci mahkeme toplaşuvını keçirdi. Toplaşuv devamında imaye tarafınıñ şaatı, 2014 senesi fevralniñ 26-nda Rusiye tarafdarlarınıñ miting iştirakçilerinde demir parçalarını, plastik şişelerini ve gaz körgenini ayttı. Bunı mayısnıñ 24-nde Çiygoznıñ advokatı Nikolay Polozov Qırım.Aqiqatqa bergen izaatında haber etti.

Polozovnıñ sözlerine köre, şaat fevralniñ 26-nda saba Qırım MC Yuqarı Şurasınıñ binası yanında ötkerilgen mitingke kelgen, ve avtobusta ketirilgen 170-200 nefer insan Rusiye tarafdarlarınıñ mitingine qoşulğanını körgen ve bundan soñ «çatışmalar» başlandı.

«Rusiye tarafını tutqan miting iştirakçileri tecavuziy surette davranıp başladı. Olar Ukraina tarafdarlarına yaqınlaşacaq oldılar. Bundan soñ sıquv başlandı. Kerçekten, mitingteki Rusiye tarafdarları ukrain tarafını tutqanlarnı içteki azbar meydanından basıp çıqarmağa tırıştı. Plastik şişelerni atıp başladılar. Şaat, demir parçalarnıñ atılğanını kördi. Parçalardan biri qırımtatarnıñ başına tüşti. Onda qan aqtı. Bundan da ğayrı gaz qullanılğanı körüne edi», – degen şaatnıñ sözlerini Polozov seslendirdi.

Advokat qoştı ki, şaat Ahtem Çiygoznıñ tarafından qanunğa qarşı kelecek iç bir areket körmegenini beyan etken eken.

Ahtem Çıygoz 2015 senesi yanvar ayında 2014 senesi fevralniñ 26-da Qırım Yuqarı Şurasınıñ binası ögünde Ukrainanñ territorial bütünligine qol tutulmasına bağışlanğan mitingde iştirak etkeni içün tutulğan edi. O zaman miting iştirakçılerine Rusiye tarafdarları, şu cumleden «Russkoye yedinstvo» firqasınıñ temsilcileri qol tutqan edi.

«Çiygoz davasını» Rusiye mahkemesi qapalı toplaşuvda: qırımtatar Meclisi yolbaşçısınıñ muavini sıfatındaki Ahtem Çiygozniñ davası olaraq ve ayrıca, davanıñ eki iştitakçisi olğan Ali Asanov ve Mustafa Degermenci davası şeklinde ekige ayıraraq, «26 fevral» davası çerçivesinde baqmaqta.

XS
SM
MD
LG