Link açıqlığı

Polozov: Çubarovnı mahkemege davet etmek muracaatı red etilgen soñ «Çiygoznıñ davasında» mahkümiyet bekleymiz


Advokat Nikolay Polozov

Kremlniñ nezaretindeki Qırım Yuqarı mahkemesi yarımadağa Qırımtatar Milliy Meclis reisi Refat Çubarovnı ifade bermesi içün çağırttırmağa razı olmağan soñ, Ahtem Çiygozğa qarşı açılğan davada qabaat ükümi çıqarılacağını beklemege mümkün. Bunı Qırım.Aqiqatqa bergen izaatında mabusnıñ advokatı Nikolay Polozov beyan etti.

«Mahkeme özüni temeline qadar itibardan tüşürdi. Asılında, endi artıq iç bir mahkeme toplaşuvını keçirmege de kerek degil. Çiygozğa qarşı qabaat ükümi çıqarılacağı endi bes-belli. Çünki bu davada esas ve müim olacaq deliller – şaat Çubarovnıñ bere bilecegi ifadeler – mahkeme tarafından red etildi», – dedi Polozov.

Bundan evel Qırımda mahkeme, Qırımtatar Milliy Meclis reisi Refat Çubarovnı «Çiygoznıñ davasında» ifade bermesi içün işğal etilgen Qırımğa çağırttırmaq muracaatını red etkeni aqqında haber etilgen edi. Polozovnıñ fikirine köre, böyle qarar siyasiy sebeplerden alındı.

Mayısnıñ 15-nde Meclis reisi Refat Çubarov, Kyivde ötkerilgen matbuat konferentsyası devamında, öz muavini Ahtem Çiygoznıñ davasında imaye tarafınıñ şaatı olıp ifade bermege azır olğanını beyan etken edi. Çubarov öz beyanıtını seslendirip, Kreml nezaretindeki Qırım Yuqarı mahkemesi toplaşuvına, özüniñ şaatlıq yapmaq içün çağırılmasına razılıq berdi.

Ahtem Çıygoz 2015 senesi yanvar ayında 2014 senesi fevralniñ 26-da Qırım Yuqarı Şurasınıñ binası ögünde Ukrainanñ territorial bütünligine qol tutulmasına bağışlanğan mitingde iştirak etkeni içün tutulğan edi. O zaman miting iştirakçılerine Rusiye tarafdarları, şu cumleden «Russkoye yedinstvo» firqasınıñ temsilcileri qol tutqan edi.

«Çiygoz davasını» Rusiye mahkemesi qapalı toplaşuvda: qırımtatar Meclisi yolbaşçısınıñ muavini sıfatındaki Ahtem Çiygozniñ davası olaraq ve ayrıca, davanıñ eki iştitakçisi olğan Ali Asanov ve Mustafa Degermenci davası şeklinde ekige ayıraraq, «26 fevral» davası çerçivesinde baqmaqta.

XS
SM
MD
LG