Link açıqlığı

Saatnıñ esas haberi

Ukrainada ne qadar çoq serbestlik olsa, o qadar da tez «Qırım divarı» yıqılır – ukrain naziri


Ukraina İnfrastruktura naziri Volodımır Omelân, Qırımnıñ işğalden azat etilüv suratı qıtaiy Ukrainadaki serbestlikniñ seviyesinen bağlı olğanını tüşüne. Bunı Omelân mayısnıñ 23-nde «Qırımnıñ istilâsı: neticeler, vaziyeti, tahminler» konferentsiyasına Kyivde beyan etti, dep bildire Qırım.Aqiqat muhbiri.

«Qırımda serbestlik ket-kete eksile. Rusiye olğan yerde serbestlikniñ olması mümkün degil. Men tasdiq etem: Qırım – Ukrainadır, ve o Putinniñ rejimi avdarılğan soñ qaytacaq. Ukrainada ne qadar çoq serbestlik olsa, o qadar da tez «Qırım divarı» yıqılır», – dedi Omelân.

Mayınıñ 23-nde Kyivde, yarımadanıñ işğalden azat etilmesine bağışlanğan « Qırımnıñ istilâsı: neticeler, vaziyeti, tahminler» konferentsiyası başlandı.

Konferentsiyanıñ kün tertibindeki meseleler – Ukraina siyasetiniñ şekillendirüv yolları: sanktsiyalar üküm sürgen devirde vaqtınca istilâ altında bulunğan topraqlarnıñ iqtisadiyatı ve olar arasındaki transport bağ, ayat keyfiyeti ve mecburen köçken insanlar, yarımadada insan aqlarını zarar berelebilecek yañı musibetler, uquq modeli ve qırımtatar muhtariyeti, esas Ukrainada ğayrıdan meydanğa ketirilgen Qırım territorial idariy organları çalışuv hususiyetleri.

Forumda çetelden kelgen musafirler ve nezaretçiler, cemaatçılar, qırımtatar Meclisiniñ reberiyeti, ekspert, jurnalist, Qırım Muhtar Cumhuriyeti prokuraturasınıñ temsilcileri ve Ukraina halq deputatları iştirak etmekte.

Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG