Aqmescitte mayısnıñ 23-nde Suleyman Kadırovnıñ davasında şaatlardan biri Rusiye FSB tarafından sorğulandı. Bunı Qırım.Aqiqatqa bergen izaatında qırımlı advokat Edem Semedlâyev haber etti.
Semedlâyev: «Bügün Suleyman Kadırovğa yaqın lğan biri sorğulandı. Biz, Rusiye Esas qanunınıñ 51-ci maddesine esaslanıp, ifade bermege red ettik. Taqiqatçınıñ pek çoq sualleri bar edi. O bu sorğuğa yahşı azırlandı – adam advokatsız kelecegini tüşündi ve onı (şaatnı – QA) bir de bir şekilde sorğuda keçmege mümkün olacağını tüşündi. Biz anda «Suleyman Kadırov ne qadar güzel adam» olğanı aqqında sualler körmedik ve bu sebepten iç bir ifade bermege razı olmadıq», – dep tarif etti.
2016 senesi oktâbrniñ 5-de Rusiye uquq qoruyıcıları qırımtatar faili Suleyman Kadırovnıñ evine tintüv keçirmege keldi. Tintüv vaqtında bilgisayar ve telefon alındı. Tintüv mahkemeci Rodionov İgor İvanoviçniñ Rusiye Federatsiyası sıñırlarını tanımamaq ve «Asker» qırımtatar batalyonına qoltutmaq çağıruvlarını ögrenme Qararı esasında keçirildi.
Aprelniñ 3-nde qırımlı fail ve uquq qorçalayıcı Suleyman Kadırov, o ekstramistler cedveline kirsetilgeni aqqında beyan etti. Bunen beraber, yekâne qazançı kelgen bank kartası blok etilgen eken.
İşğalden soñ Qırımda mustaqil mühbirlerde, qırımtatar faallerinde ve Meclis azalarında kütleviy tintüvler sıq-sıq keçirilip başladı. Ukraina Tışqı işler nazirligi (TİN) işğal etilgen Qırımda ukrain vatandaşlarınıñ taqip etilmesinden qasevet çekkenini bildirdi ve basqıncılıqnı toqtatmağa çağırdı. TİN halqara toplulıqqa muracaat etip, Rusiye insan aqları ve ifade serbestligini bozmasın, ukrain siyasiy mabusları ve esirlerini azat etsin dep, oña qarşı bütün uquqiy ve siyasiy basqı usullarını qullansın istedi.
