2014 senesi Qırım istilâsını toqtatmaq mumkün olğan bir an bar edi. Bu aqta qırımtatar Meclisiniñ reisi Refat Çubarov «Apostrof»qa bergen intervyusında söz yürsetti.
«Er şeyni toqtatmağa imkân olğan qısqa bir vaqıt bar edi. Söz, fevralniñ 27-si saba Qırım Yuqarı Şurası ve nazirler Şurası binalarınıñ belgisiz şahıslar tarafından zapt etilgen maalden başlap, fevralniñ 28, qararnen üylegece, Rusiye askerleri doğrudan endirilip başlağan maalgece olğan vaqıt aqqında yürsetile», – dep ayttı Çubarov.
Meclis yolbaşçısı, mezkür ukrain militsiyası hadiminiñ bergen malümatınen de tanış olğanını qayd etti. «Bu adamnıñ aytqanına köre, 2014 senesi fevralniñ 26 aqşam saatlarında Qırım devlet müssiseleriniñ qoruma rejimi şiddetlisinden sade rejimge keçirilgen».
«Şaatnıñ bu sözleri esasında men, Qırımda er şey yerli huquq qoruma organlarına bazanaraq yapılğan edi degen fikirge keldim. Çünkü Kyivden böyle bir emir berilgen olması mümkün degil – bu iş Ukrainanıñ Qırımdaki MVD Baş idaresi tarafından teşkil etilgendir», – dep ilâve etti Çubarov.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
