Kreml nezaretindeki Rosselhoznadzor müfettişleri Yaltada keçirgen teftişi neticesinde 45 kg alman ve felemenk qaşqavalını yoq etken. Bunı müessiseniñ matbuat hızmeti bildirmekte.
«Bazarnıñ dört satış noqtasında Rusiye Federatsiyasına ketirilmesi yasaq etilgen ve saqlanıp satılğan mahsulat tapılğandır. Hususan, devlet müfettişleri Almaniya ve Felemenkte istisal etilgen meşur Maasdsam, Dorblu, Bavaria Blu, Camembert, Brie vs. markalı qaşqavallarnıñ çeşitleri olaraq 45,75 kg mahsualt tapqanlar», – denile haberde.
Müessise temsilcileri qayd etkeni kibi, «pek zararlı mahsulat» çekip alınaraq «Brener 500» hususiy sobasında yaqılğan.
Qomşu Rusiye ve işğal altındaki Qırımda, Moskva Ukrainağa bağlı Qırımnı zapt etkeni ve Ukrainanıñ ğarbına tecavuz etkeni içün oña qarşı kirsetilgen sanktsiyalarğa cevap olaraq, erzaq ve ziraat mahsulatlarınıñ ital etilmesi hususında bazı sıñırlamalar kirsetken edi.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
