Qırımlı advoka Edem Semedlâyevniñ fikine köre, mayısnıñ 22-nde Yedi Quyu qasabasında Nadir Mambetşayevniñ evinde ötkerilgen tintüv – uydurılğan cinaiy iş esasında keçirildi. Bunı Semedlâyev Qırım.Aqiqatqa bergen izaatında bildirdi.
«Bir uydurılğan cinaiy iş, yani 2016 senesi Memetovnıñ ğayıp olğaması, üzerinden endi üç tintüv aqqında bilgimiz bar, men olarda bulunğan edim. Resmi olmağan malümatqa köre, 10-ğa yaqın tintüv keçirildi. Bunı bilemiz. Uquq qoruyıcılar böyle bir ameliyat yapalar. 2014 senesi bir motosikletniñ ğayıp olğanından sebep onlarnen tintüvler ötkergen edi. Yani bir de bir uydurılğan ya da oñaytlı cinaiy iş alıp, qırımtatarlarnı biri biri artından tintip çıqalar», – dep tüşüne Semedlâyev.
Bazarertesi künü, mayısnıñ 22-nde, Yedi Quyu sakini Nadir Mambetşayevniñ evinde tintüv keçirip özüni Yedi Quyu poliysiya bölügine alıp kettiler, parmaq izlerini alıp sorğudan keçirdiler. Öz areketlerini, ğayıp olğan Enver Memetovnı qıdırğanlarınen añlattılar.
Rusiye Qırımnı işğal etken soñ yarımadada mustaqil jurnalistler, cemaat failleri, Rusiyede yasaq etilgen «Hizb ut-Tahrir» teşkilâtınen bağlı olğanlarında şeklengen Qırım musulmanları, qırımtatar Milliy areket failleri, Meclis azalarınıñ evlerinde tintüvler sıqlaştı.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
