Qırımtatar Milliy Meclisiniñ reis muavini İlmi Umerovnıñ advokatı Mark Feyginniñ fikirince, Qırımda Umerovğa qarşı mahkeme esnasını başlatqan Rusiye akimiyeti «bu davadan zarar kördi».
«Ozüñiz baqıñız, taqiqatçı Skripka İlmi ağağa «men bu davanı bir qaç aftadan bitirerim» dep aytqan edi, bu 2016 senesi mayıs ayında olğan edi. Şübesiz, bundan soñraki vaqialar Qırımtatar Milliy Meclisiniñ faaliyetini tamamen yasaqlamağa qarar alıp bu davanı başlatqan Rusiye akimiyetine fayda ketirmedi», – dep ayttı Feygin mayısnıñ 12-nde Qırım.Aqiqatqa.
Advokatnıñ qayd etkenine köre, ilk diñlevler Aqmescit rayon mahkemesinde olacaq. Şimdilik oturış künü belgilenmegen, lâkin ilk diñlevler qapalı şekilde keçirilecektir.
«Mahkeme mustaqil olsa ve cinaiy-protsessual qanunğa riayet etilse edi, bu dava iç bir vaqıt qabaat ükmü ile yekünlenmez edi... İlmi Umerovnıñ davası tarihiy olacaqtır. Qırımtatar halqı kollaboratsionizmde qabaatlanıp sürgün etilgen 1944 senesinden soñ, bugünde-bugün bu halq ve İlmi Umerov onıñ vekili olaraq Qırımda zor zamanlarnı yaşaylar. Qırımtatarları yarımadanı terk etecek ya da küreşini qanunğa uyğun bir şekilde devam etecek — bu davanıñ soñuna bağlıdır», – dep qayd etti advokat.
Umerovnıñ advokatı tahmin ete ki, ilk diñlevler 2017 senesi iyün ayınıñ başında ola bile, soñra dava bütünley baqılacaq. Feygin «qabaat içün bir sıra ediye» ve «bu dava şamatalı» olacağında işandırdı.
İlmi Umerovğa qarşı ekstremizm maddesi boyunca FSB tarafından cinaiy iş açılğanını 2016 senesi mayıs 12 künü Qırımnıñ sabıq prokurorı Natalya Poklonskaya beyan etken edi.
Meclis reisi muavininiñ yaqalanuvı, tintüvi ve oña qarşı cinaiy işniñ açılması, mecburiy surette mahkeme-psihiatrik ekspertizanıñ keçirilmesi içün onıñ delihanege yerleştirilmesi – cemiyette ve dünyada rezonans çıqarğan edi.
Rusiye Qırımnı işğal etken soñ yarımadada mustaqil jurnalistler, cemaat failleri, Rusiyede yasaq etilgen «Hizb ut-Tahrir» teşkilâtınen bağlı olğanlarında şeklengen Qırım musulmanları, qırımtatar Milliy areket failleri, Meclis azalarınıñ evlerinde tintüvler sıqlaştı.
